कोरोना भाइरस : बेइजिङ्गं पिहांवनेत न्हूगु नियम

बेइजिङ (बीबीसी) – बेइजिङय् कोरोना भाइरसया संक्रमण अप्वयेवं शहरं पिहांवनेगु निंतिं न्हूगु नियम लागू याःगु दु ।

बुधवाः जक थप ३१म्ह मनूतय्त संक्रमण जूगु लूगु दु । थ्व लिपा बेइजिङ शहरयात उच्च जोखिम, मध्य जोखिम व न्यून जोखिम क्षेत्र कथं मापदण्ड तयार याःगु दु । बेइजिङया छगू क्षेत्रयात उच्च जोखिमया धलखय् तयातःगु दुसा २७ गू क्षेत्रयात मध्य जोखिम क्षेत्र कथं कयातःगु दु । उगु मापदण्ड कथं उच्च व मध्य जोखिम क्षेत्रया मनूत बेइजिङ शहर त्वःता पिहांवने दइमखु ।

अथेहे न्यून जोखिम क्षेत्रया मनूत शहरं पिहांवनेमाःसा कोरोना परीक्षण यानाः जक वनेमाःगु व्यवस्था याःगु दु । तर परीक्षण यायेगु थासय् अत्याधिक मनूतय् चाप दुगुलिं परीक्षण यायेत तसकं थाकु । बेइजिङ दुहांवइगु व पिहांवनीगु १ हजार २०० हवाई उद्दान रद्द याःगु दुसा रेल सेवायात जुलाई ९ तकया निंतिं म्हो याःग दु ।

५७ न्हु तक कोरोना भाइरस स्थानीय रुपं सरे मजूगु बेइजिङया सीनफाडी धाःगु बजारं भाइरसया न्हूगु लहर सुरु जूगु खः । न्हूगु लहरया कारणं आः तक १ सय ३७म्ह मनूतय्त संक्रमणया पुष्टि जुइधुंकूगु दु ।