स्वास्थ्य मन्त्रालयपाखें कोरोना सतर्कता नालेत इनाप

येँ – सरकारं कोरोना संक्रमण दर अप्वया वनाच्वंगु धासें स्वास्थ्य सतर्कता नालेत धाःगु दु । जःला खःला देय् भारतय् कोरोना संक्रमण अप्वया वयेवं स्वास्थ्य मन्त्रालयं स्वास्थ्य सतर्कता नालेत इनाप याःगु खः ।

स्वास्थ्य तथा जनसंख्या मन्त्रालयया सहप्रवक्ता समीरकुमार अधिकारीं भारतय् कोरोना संक्रमण दर अप्वया वयाच्वंगुलिं नेपालय् नं संक्रमण अप्वयेफइगु धासें स्वास्थ्य सावधानी नालेत इनाप याःगु खः ।

स्वास्थ्य मन्त्रालयं अस्पताल व चिकित्सकपिंत संक्रमण म्हो यायेत आवश्यक तयारी न्ह्याकेत निर्देशन बीधुंकूगु खँ नं अधिकारीं धयादीगु दु । स्वनिगः लिसें देय्न्यंकं कोरोना संक्रमण म्हो जुइवं सर्वसाधारण जनतां स्वास्थ्य मापदण्ड नालेगु त्वःतूगु धासें हाकनं स्वास्थ्यया मापदण्ड पालना यायेमाःगु आवश्यकता दुगु खँ मन्त्रालयं धाःगु दु ।

स्वास्थ्य मन्त्रालयया सहप्रवक्ता अधिकारीं धाःगु दु, ‘झी विश्वव्यापी रुपय् कोभिड–१९ या संक्रमण वा गुगुं न्हू कथंया संक्रमण वइबलय् उकिया विश्लेषण यायेगु अन्तर्राष्ट्रिय प्लेटफर्मय् न्ह्याबलें स्वानाच्वंगु दु, अन्तर्राष्ट्रिय स्वास्थ्य विधि नियमावली कथं फोकल पर्सनया ल्याखँ, फोकल इस्यूया ल्याखँ नं झीत फुक्कं खँया जानकारी जुयाच्वंगु दुु, आःया इलय् जःलाखःला देशय् संक्रमण अप्वया वनाच्वंगु दु, विश्वव्यापी रुपय् संक्रमण म्हो जूगु खःसां नं झी च्वनाच्वनागु क्षेत्रय् संक्रमण यक्व अप्वया वनाच्वंगु दु, झीसं न्हापांगु लहरय् नं उगु खँ भोगे यानागु व खनागु खः । न्हापांगु लहरय् भारतय् संक्रमण उच्च बिन्दुइ थ्यंगु लछिया दुने नेपालय् नं संक्रमण अप्वःगु अवस्था झीसं भोगे यानागु खः । उकिं आः भारतय् संक्रमण अप्वया वंगुलिं झी नं संवेदनशील जुइमाःगु दु ।’

उकथं हे अधिकारी विदेशं वइपिं नागरिकयात न्हय्न्हुया अनिवार्य क्वारेन्टाइय् च्वनेत व फुकस्यां मास्क अनिवार्य तयेत नं इनाप यानादीगु दु । लिसें कोरोनाया थीथी चरणया खोप काये ल्यंदुपिंसं नं इलय् हे कोराना विरुद्धया खोप कायेत नं सहप्रवक्ता अधिकारी इनाप यानादीगु दु ।
थ्वहे झ्वलय् म्हिगः जक नेपालय् गुम्हेसित कोराना भाइरस संक्रमण पुष्टि जूगु दु । स्वास्थ्य तथा जनसंख्या मन्त्रालयया कथं ३ हजार ३३३ म्हेसिया पीसीआर परीक्षण याःगुलिइ ८ म्हेसिके कोरोना खनेदुगु खःसा ९२२ म्हेसित एन्टीजेन परीक्षण याःबलय् छम्हेसिकें संक्रमण पुष्टि जूगु खः ।

अथे हे म्हिगः कोराना संक्रमण १८ म्ह मुक्त जूगु दु । थौंकन्हय् देय्न्यंकं २११ म्ह सक्रिय संक्रमित दु । थुपिं मध्ये २०९ म्ह होम आइसोलेसनय् दुसा छम्ह संस्थागत आइसोलेसनय् च्वनाच्वंगु दु । संक्रमित मध्ये छम्ह आईसीयुलय् दु ।

सम्बन्धित बुखँ

LEAVE YOUR COMMENTS