बालेन साहया स्टाटसं रवि लामिछानेयात धक्का
येँ (नेपालभाषा टाइम्स)- येँ महानगरपालिकाया मेयर बालेन साह व राष्ट्रिय स्वतन्त्र पार्टीया अध्यक्ष रवि लामिछाने दथुइ राजनीतिक ‘टकरार’ ब्वलंगु दु । मेयर साहं बुधवाः चान्हय् पोष्ट यानादीगु छगू स्टाटस लामिछाने व वय्कःया पार्टीप्रति लक्षित जूगुलिं वय्कःपिनि दथुइ राजनीतिक मतभेद ब्वलंगु अनुमान याना हःगु खः ।
रवि लामिछानेया पार्टी रास्वपाया नकतिनि क्वचाःगु केन्द्रीय कमिटीया बैठकं ‘मिसन ८४’ धकाः आः वइगु वि.सं. २०८४ सालय् जुइगु चुनावय् बहुमत हयाः सरकार चले यायेगु रणनीति दयेकूगु खः । रास्वपाया थ्व रणनीति सार्वजनिक जुइवं मेयर साहं चान्हय् हे छगू पोष्ट यासें ‘८४ सालया छिमिगु मिसनं देश बने जुइ मखु, बरु छिमिगु ८४ सिधयेधुंकाः जक देश बने जुइ’ धकाः च्वयादीगु खः ।
साह वा लामिछाने निम्हं नेपाली राजनीतिया न्हूपिं ‘खेलाडी’ खः । बालेन साहयात मेयर पदय् त्याकेगु लागिं लामिछानें नं तःधंगु मेहनत याःगु खः । साह चुनावय् त्यायेधुंकाः उकिया हे लबः कयाः लामिछानें साहयात समेत थःगु पुचलय् हयाः आमचुनाव ल्वायेगु रणनीति दयेकूगु खः । तर पार्टी दयेकाः चुनावय् वनेगु खँय् साह सहमत मजुल । वयां लिपा लामिछानें ‘स्वतन्त्र’ धइगु हे खँग्वः तयाः पार्टी चायेकेवं साह तम्वःगु खँ वय्कःलिसे सतीपिंसं धायेगु याः ।
आः २०८४ सालया चुनावय् बालेन साह नं ल्वाइगु हुइनाभुइना जुयाच्वंगु दु । वय्कलं रास्वपाया हे टिकट कयाः चुनाव ल्वाइगु खँ नं पिहां वःगु खः । तर लिपांगु इलय् धाःसा साहं न्हूगु हे पार्टी चायेकाः चुनाव ल्वायेगु तयारी यानाच्वंगु धकाः नं खँ पिहां वःगु खः । यदि साहं न्हूगु पार्टी चायेकल धाःसा उकिया दकलय् तःधंगु धक्का रास्वपायात लाइगु अनुमान जुयाच्वंगु दु । साहं म्हीग तयादीगु स्टाटसं आः रास्वपालिसे स्वापू हे त्वाःथलेगु तकया अवस्था पिहां वःगु खँ धाःगु दु ।
थ्वहे झ्वलय् थुगुसी मधेश प्रदेशय् केन्द्रीय समितिया बैठक च्वं वंम्ह रवि लामिछाने महोत्तरीस्थित मेयर बालेन साहया गामय् नं वंगु खँ सीदुगु दु । साहया गामय् वनाः लामिछानें थःगु संगठन विस्तारया कुतः याःगु खः । थुकिं यानाः बालेन रवि छामिछाने खनाः तम्वःगु अनुमान याःगु दु ।
LEAVE YOUR COMMENTS