ललिता निवासया फुकसित हे त्वःतल

येँ (नेपालभाषा टाइम्स)- जिल्ला अदालत येँनं ललिता निवास जग्गा प्रकरणय् ज्वंपिं झिंच्याम्ह मध्ये झिंन्हय्म्हेसित धरौटीइ त्वःतूगु दु । न्यायाधीश भोलानाथ ढकालया इजलासं केशव तुलाधर छम्हेसित साधारण तारेखय् व मेपिंत धरौटी कयाः त्वःतेत आदेश बिउगु खः । तुलाधरयात जग्गा लित बीगु प्रयोजनया नितिं जक प्रतिवादी दयेकूगुलिं साधारण तारेखय् त्वःतूगु खः ।

जिल्ला अदालतं भाटभटेनी सुपर मार्केटया सञ्चालक मीनबहादुर गुरुङयाके दकलय् अप्वः २ करोड ४६ लाख धरौटी काःगु दु । उकथं हे तत्कालीन मालपोत अधिकृत कलाधर देउजा व समरजंग कम्पनीया तत्कालीन सहायक लेखापाल विनोद पौडेलपिंके १५ लाख धरौटी काःगु दु ।

उकथं हे तत्कालीन भूमिसुधार तथा व्यवस्था विभागया महानिर्देशक रुद्रकुमार श्रेष्ठ, शहरी विकास तथा भवन निर्माण विभागया तत्कालीन सिनियर डिभिजनल इन्जिनियर बालकृष्ण श्रेष्ठ, डिल्लीबजार नापी कार्यालयया सर्वेक्षक घमनकुमार कार्की व डिल्ली बजार मालपोतया तत्कालीन खरिदार गोपाल कार्कीयाके ७ लाख ५० हजार तका धरौटी काःगु दु ।