ने. सं. ११४६ तछलाथ्व दशमी -

मायादेवीया देगलय् लुँयागु गजू

येँ (नेपालभाषा टाइम्स)-लुम्बिनीइ मायादेवीया देगलय् लुँयागु गजू छुइगु ज्या जूगु दु । थाइल्याण्डया बौद्धमार्गी रतना मालिनोङ व लर्टट्रथ आक्रापास पोङपिंसं थ्व लुँयागु गजू छुनादीगु खः ।

म्हिगः वय्कःपिं थाइल्याण्डं नेपाः वयाः लुम्बिनीइ विशेष पुजा यासें थ्व लुँयागु गजू छुइगु ज्या यानादीगु खः । मायादेवी देगःया पुलांगु गजू हिलेगु खँ जुयाच्वंगु इलय् लाक्क हे थाइ दातापिंसं थ्व गजू छुना बीगु खँ धाःगु दु । लुम्बिनी विकास कोषया सदस्य सचिव सानुराजा शाक्यया कथं मायादेवीया देगलय् छूगु गजू ६० लाख तकाया लागत खर्च यानाः दयेकूगु खः ।