स्वनिगलय् मापसे जांचय् हाकनं कडाइ

येँ – महानगरीय ट्राफिक प्रहरी महाशाखां स्वनिगलय् लिपांगु इलय् हाकनं मापद पदार्थ सेवन (मापसे) कडा यानाहःगु दु । वंगु छुं ई तक तसकं म्हो जक थासय् मापसे जांच याना वयाच्वंगु खःसा आः हाकनं थुकियात तीव्रता बिया हःगु दु । महाशाखां मापसे जांचयात कडा यायेगु झ्वलय् आः वयाः न्हिनसिया इलय् नं मापसे जांच यायेगु यानाहःगु दु ।

मेखे बहनिसिया इलय् याना वयाच्वंगु मापसेयात थप कडा यानाहःगु खः । महाशाखां प्रहरी निरीक्षकया नेतृत्वय् न्हिनसिया इलय् नं थीथी थासय् आकस्मिक रुपं मापसे जांच यायेगु अभियान न्ह्याकागु महाशाखाया प्रवक्तालिसें प्रहरी उपरीक्षक जयराज सापकोटां जानकारी बियादीगु दु ।

थ्व स्वयां न्ह्यः ट्राफिक प्रहरी सनिलय् व बहनिसिया इलय् जक उकथं मापसे जांच यायेगु याना वयाच्वंगु खः । सवारी दुर्घटना अप्वय वंगु धासें आः न्हिनय् नं मापसे जांच यायेगु शुरु यानागु महाशाखां न्ह्यथंगु दु । आःया निंतिं निगू पुचलय् प्रहरी परिचालन यानाः मापसे जांच यानाच्वनागु व लिपा आवश्कताकथं जांच टोली अप्वयेकाः अझ कडा याना यंकेगु प्रहरीं न्ह्यथंगु दु ।

महाशाखां शुरुया इलय् निगू इलय् मापसे जांच अभियान न्ह्याकूगु खः । न्हापां सनिलया ७ निसें १० ताःईतक व वयां लिपा बहनिसिया ११ ताःइलंनिसें चान्हसिया १ ताः इलय् तक मापसे जांच यायेगु याना वयाच्वंगु खः । न्हापा मापसे याइपिंत निश्चित शुल्क कायेगु याःगु खःसा वयां लिपा लाइसेन्सय् प्वाः खनेगु अभियान न्ह्याकूगु खः ।