नेवाःतय्त बिस्कं गुथि विधेयक माः

विवादय् वयाच्वंगु गुथि विधेयकयात कयाः येँ महानगरपालिकाया सम्पदा तथा पर्यटन विभागया ग्वसाः ज्यापु महागुथि येँ महानगर समितिया व्यवस्थापनय् शुक्रवाः येँय् छगू अन्तक्र्रिया ज्याझ्वः जुल । ज्याझ्वलय् मूपाहां कथं झाःम्ह येँ महानगरपालिकाया मेयर विद्यासुन्दर शाक्यं सरकारं गुथि विधेयक लित कायेधुंकाः आः झीगु धापू छु खः धइगु खँ पित बीमाःगु बिचाः तयादिल ।

सकल नेवाःतय्गु मंकाः अवधारणा तयार यायेगु लागिं नेवाः समुदायया थीथी जातीय पुचःतलिसे अन्तक्र्रिया यानावं वने माःगु बिचाः नं वय्कलं न्ह्यःने तयादिल । ज्याझ्वलय् ज्यापु महागुथिलिसे आवद्ध थीथी कानूनविद्तय्सं गुथि विधेयकयात कयाः न्ह्यथनादीगु अवधारणायात नं वय्कलं सकारात्मक रुपं कयादिल ।

नापं आः थ्व अवधारणायात सम्पूर्ण नेवाःतय्गु मंकाः अवधारणा दयेकाः न्ह्याः वनेमाःगु सुझाव नं बियादिल । अज्याःगु मंकाः अवधारणा तयार जुइधुंकाः उकियात सरकार समक्ष पेश यानाः कार्यान्वयन याकेगु ज्याय् थः लिसें येँ महानगरपालिका सहजीकरणया भूमिका म्हितेत तयार दुगु खँ नं वय्कलं खुलासा यानादिल ।

गुथि संस्थान भंग यायेधुंकाः उकिया थासय् प्राधिकरण दयेकेगु खः लाकि, कोष दयेकेगु खः लाकि, परिषद् दयेकेगु धकाः थीथी बिचाः न्ह्यःने वयाच्वंगु खँ कुलादिसें व्यापक अन्तक्र्रिया यानाः छगू हे अवधारणा दयेकेमाःगु बिचाः नं वय्कलं तयादिल । ज्याझ्वलय् आः झीत गज्याःगु विधेयक माः धइगु बारे खँ तसें अधिवक्ता जुजुकाजी महर्जनं धयादिल, ‘झीत विधेयक अवश्य माः तर थ्व झीसं धाःथेंज्याःगु विधेयक जुइमाः ।

गुथि संस्थान खारेज जुइधुंकाः छगू राष्ट्रिय गुथि आयोग गठन यायेमाः । थुकिया ज्या धइगु नेपाल राष्ट्र बैंकया थें जुइमाः । राष्ट्र बैंकं देय्या फुक्कं बैंकया निगरानी याइ, निरीक्षण याइ, अनुगमन याइ, कानून कथं सञ्चालन मजूगु खने दत धाःसा दण्ड नं बी । तर बैंक हे थःगु यानाः काये फइ मखु ।

आः गुथि आयोगया ज्या नं थ्वहे जुइमाः । थ्वं गुथिया अनुगमन व निरीक्षण याइ, गुथि व गुथिया जग्गा मासे यायेत्यंसां वयात दण्ड बी, तर गुथिया सम्पत्ति हे हड्पे यानाः काये दइ मखु ।’गुथि व गुथियारतय्त कानूनं हे अधिकारसम्मत याना बिल धाःसा गुथिया जग्गायात थौंया युगयात ल्वयेक प्रयोग यानाः आय अप्वयेके फइ धइगु वय्कःया बिचाः खः ।

अथे हे अधिवक्ता बुद्धरत्न प्रजापतिं गुथि सञ्चालन व व्यवस्थापन सम्बन्धित गुथितय्सं हे याइ तर उकी सुनां नं मजिउगु ज्या यात धाःसा वयात दण्ड बीगु कानुनी प्रावधान तयाः अधिकार गुथियात हे दइगु विधेयक दयेके माःगु बिचाः तयादिल । गुथिया जग्गायात मेमेगु ज्याय् प्रयोग याना तःसां उकिया आम्दानी धाःसा सम्बन्धित गुथितय्त हे बीमाःगु प्रावधान सहितया विधेयक दयेकेमाःगु सुझाव नं वय्कलं बियादिल ।

अधिवक्ता रीना डंगोलं नेवाःतय्गु गुथिया जात्रा पर्व सञ्चालनया छगू व जग्गा व्यवस्थापनया लागिं मेगु हे यानाः निगू अलग अलग निकाय माःगु बिचाः तयादिल । जात्रा पर्व सञ्चालनया लागिं फुक्कं गुथिया प्रतिनिधित दुथ्याःगु ‘नेवाः संस्कृति परम्परा कोष’ धकाः छगू छुट्टै निकाय दयेकाः न्ह्याः वन धाःसा व्यवहारिक जुइगु खँ वय्कलं तयादिल ।

नेवाःतय्के गुथिया नापनापं संस्कृति नं दु तर पिने जिल्लाय् धाःसा गुथि जक दु संस्कृति धाःसा मदुगु जुयाः थ्व निगुलिं थाय्या गुथियात छथासं तयाः कानून दयेके मजिउगु राय नं वय्कलं बियादिल । अधिवक्ता युद्धमान महर्जनं नं गुथि विधेयक बारे सुझाव बियादीगु उगु ज्याझ्वलय् सहभागीपिंपाखें सुवर्णमान डंगोल, पञ्चनारायण महर्जन, मचाराजा डंगोल, पञ्चरत्न डंगोलं नं सुझाव बियादीगु खः ।

अन वःगु थ्व फुक्कं सुझावत ज्यापु महागुथि केन्द्रयात लःल्हायेगु खँ महागुथि येँ महानगर समितिया कार्यवाहक नायः नानीहेरा महर्जनं कनादिल ।ज्याझ्वः येँ मनपा सम्पदा तथा पर्यटन विभागया संयोजक लिसें येँ १८ वडाया अध्यक्ष न्हुछेकाजी महर्जनया सभापतित्वय् जूगु खः ।

ज्याझ्वलय् ज्यापु महागुथिया केन्द्रीय नायः राजभाइ जकःमिं थ्व आन्दोलनय् ज्यापुत सक्रिय जुयाः न्ह्याः वःगु खःसा आः नेवाः समुदायया सकल जातिलिसे नं समन्वय यानाः न्ह्याः वनेगु खँ कनादिल ।

सम्बन्धित बुखँ

LEAVE YOUR COMMENTS