पूँजीवादी राजनीतिक संस्कार

म्हिगःतक राजनीतियात समाजसेवाया दृष्टिकोणं स्वयेगु याः । थौं व सम्भव मंत । आदर्श समाज निर्माणया लागिं राजनीति यायेगु ई आः झीथाय् मंत । कर्मय् विश्वास याइपिं कर्मनिष्टत कम्युनिष्ट जुइगु म्हिगःया चलनय् ह्याकिं वंगु दु। अथे जुयाः थौं सच्चा कम्युनिष्ट मालेत उखेंथुखें जुइमाःगु स्थिति वःगु दु। देसय् तःधं तायेकीपिं गुलिं कम्युनिष्ट पार्टीतय्सं जनयुद्ध लिपाया शान्ति सम्झौताय् सेना समायोजनया त्वह तयाः करोडौं मखु अर्बौंया सम्पत्ति मुंकूगु समाचार पिने वयेवं जनता कम्युनिष्ट सुयात धायेगु धइगु अन्यौलया स्थितिइ थ्यंगु दु। थौं उगु कम्युनिष्ट शक्तिं थःपिं सत्ताय् थ्यंकाः पूँजीवादी अर्थतन्त्रया लिधंसाय् देय् यात न्ह्यःने यंकेगु क्वःछिउगु दु। अथे जुयाः नं जनयुद्ध पूँजीवादी सत्ता प्राप्त यानाः सिंहदरवार व बालुवाटार दुहां वनेगु निहुँ बाहेक मेगु मखु धइगु स्पष्ट जूगु दु ।

थुलि चिधंगु घेरा दुने च्वनाः कम्युनिष्टया नामं कमे यायेगु अभियान चले जुयाच्वन नं पटक्क हे विरोधया सः न्ह्यःने मवगु धइगु सारा जनतां पूँजीवादया गर्भय् समाजवादया जन्म जुइ धकाः मौन च्वंगु जकं खः ला कि धकाः अनुमान यायेमाःगु अवस्था ब्वलंगु दु। तर खँ अथे मखु। चिचिधंगु आन्दोलन, अभियान व चेतनामूलक ज्याझ्वःपाखें कन्हय्या विशाल आन्दोलनया लागिं बः चूलाइगु खः । थौं भ्रष्टाचार व अनियमितताया जाः सकभनं न्यनाच्वंगु दु ।  सकसितं उकथंया ब्व चूलानाः सकलें मौन खनेदु ।

गबले थःके च्वंगु ब्व लुटे जुइ । चूलानाच्वंगु ब्वय् नं थः यथें नये मखंगु स्थिति ब्वलनी । अले हाकनं थुपिं थःथः ल्वानाः थवंथः पोल पोलापोल याना जुइ । वर्तमान अवस्थाय् निगू पार्टी छथाय् जुल धाःसां इमि दथुया कमी कमजोरी व भ्रष्टाचारत छताछुल्ल जूवंगु नं अथे जुया खः । थ्व इलय् सु गुलि लखय् लानाच्वंगु दु धइगु खँ ह्वातां खनेदु। आदर्शया ख्वाःपाः पुनाः कम्युनिष्ट व कांग्रेसया नामं भ्रष्टाचार व अनियमितताया ज्या याना जूपिं पार्टीइ हैसियत कायम यायेत ताःलाःपिं छुं ब्यक्ति नं उगु इलय् तक अवश्य नं ध्याकुनय् लाः वनी तिनि । ऐतिहासिक ज्याखँयात ध्वाथुइकाः थःगु चरित्र निर्माण यानाः न्ह्यःने वःपिं छुं नेतात बाहेक आउरे बाउरे व समर्थकतय्सं छुं नं उपलब्धि चूलाके फइमखु। स्वार्थी तत्वत उगु इलय् तक गुम्ह गन वनेमाःगु खः वनी ।

पार्टी राजनीति दुने यदि अनुशासन व पारदर्शीताय् बः बीगु खःसा उगु संस्कार व संस्कृति कन्हय् सत्ताय् वंसां वा छुं राजनीतिक पद धारण याःसां वयाके कायम जुयाच्वनी । स्वार्थी मनूत हैसियत अप्वयेकेगु ल्याखं जक राजनीति व समाजसेवाय् जुइ । इमिसं जनताया खः थें च्वकं जक सेवा यानाच्वनी ।

आम जनताया बुझाई छु दु धाःसा राजनीतिया पात्र खराब जूगुलिं थ्व अस्तब्यस्त स्थिति कायम जूगु खः । तर पार्टी राजनीति दुने यदि अनुशासन व पारदर्शीताय् बः बीगु खःसा उगु संस्कार व संस्कृति कन्हय् सत्ताय् वंसां वा छुं राजनीतिक पद धारण याःसां वयाके कायम जुयाच्वनी । स्वार्थी मनूत हैसियत अप्वयेकेगु ल्याखं जक राजनीति व समाजसेवाय् जुइ । इमिसं जनताया खः थें च्वकं जक सेवा यानाच्वनी । समाजयात धाथें खयेक न्ह्यःने यंकेत स्वइपिंसं धाःसा चांन्हिं निःस्वार्थ रुपं समाजय् ज्या यानाच्वंगु दइ । अज्याःपिंसं जक समाजयात न्ह्यःने यंके फइ । तर अख्तियारं भ्रष्टाचार उन्मूलन आयोगं थें कडा नक्सां ज्या याये फत धाःसा थन अनियमितता तसकं हे म्हो जुइगु खइ । विश्वन्यंकं शान्ति क्षेत्र धकाः नां जाःगु झीगु देय् नेपाः याकनं विकास जुइगु खइ । तर सतक, लँ व मेमेगु खँ जक मखु कि मनूया जीवनस्तरयात नं न्ह्यःने यंके फयेकेमाः ।

पूँजीवादी सत्ताय् वनाः आमूल परिवर्तनया आशा यायेगु नं बेकार खः । थ्व सम्भव नं जुइमखु। छुं नं विश्व ब्रम्हाण्डय् उगु खँ लागू नं जूगु मदु। सुविधा जक मालाः असुविधा न्हंके फइमखु। कठीन संघर्षय् मदिकं न्हयःने वने फत धाःसा जक ब्यवस्थायात परिवर्तन यायेफइ । जनयुद्ध व आन्दोलन थेंज्याःगु ज्या अज्याःगु स्यल्लाःगु ल्वाभः खः । तर विदेशी उजंकथं न्ह्याइगु गुलिं आन्दोलन लिपा वनाः अथें टुहे जूगु आपालं दसु दु। गुगुं सत्ताया भरय् चले जुइगु आन्दोलन अले विदेशीया भरय् जूगु गुलि आन्दोलन व युद्धत निष्कर्ष विना क्वचाःगु दसु झीथाय् नं आपालं दु। २०५२ निसें २०६२ तकया छगू दशक ताःहाकःगु जनयुद्ध नं अज्याःगु छगूकथं विदेशी इसारां चले जूगु खः । थःहे जनतायात चेतना थनाः सचेत व संगठित यानाः आन्दोलन व युद्ध न्ह्याकूगु जूसा छगू दशक दुने जनयुद्ध सफल जुइगु खइ । तर लिपा भारतया इसाराय् १२ बुँदाया सहमति भारतय् हे च्वना जुल । उकिं यानाः गज्याःगु इच्छां थःगु ज्यान पाना वंपिं कायम्ह्याय् तंके माःपिं व अंगभंग जूपिं धाःसा थौं तकं बिच्चलीइ लानाच्वंगु दनि ।

थौं मेपिंसं जक मखु कि पार्टी पंक्तिया मनूतय्सं नं थुलिमछिं क्षति जूगुया हर हिसाव ग्व धकाः पार्टीया नेतृत्व पंक्तियाके क्षतिपूर्तिया माग यानाच्वंगु अवस्था दु। तर निश्चित ब्यक्ति वा वर्ग तःमि जुयाः उच्च पदय् थ्यनेवं दुःख भोगे याःपिं, यातना सह यापिं व सेनाया गोलीं कःपिनि परिवार धाःसा थौंतक नं राहतया प्रतिक्षाय् च्वनाच्वंगु दनि । वास्तविक राहत चूलाकेगु लागिं थौं नं इपिं सत्तालिसे मखु कि भगवानलिसे पुकार यानाच्वंगु अवस्था दु । थ्व इलय् पार्टी एकीकरण व विभाजनं छुं भचा जूसां चर्चा जुयाच्वंगु दु। पार्टी एकीकरणया दँ दँ तक नं आपाःसिनं असन्तुष्टि बाहेक मेगु चीज चूलाके फयाच्वंगु मदुनि । थथे जूगु मू कारण धाःसा ध्यबाया भरय् चुनाव त्याकेगु व भारतय् थें हे गुण्डा व तस्करी ज्या याइपिं जक चुनाव त्याइगु स्थितिं याना खः धाये माःगु दु ।

मित्र राष्ट भारतय् जक फुलनदेवी थेंज्याःम्ह डाकुनि सदनय् प्रवेश जूगु खबर झीसं ब्वनागु खः । तर थ्व इलय् नेपालय् नं प्रहरीया मोष्ट वान्टेडया लिष्टय् लाःम्ह मनू, हत्या द्वपनय् ज्यान मुद्दाय् लानाच्वंम्ह ब्यक्ति व कुख्यात गुण्डात नापं चुनाव त्याका वःगु दसुत आपालं खने दयावःगु दु । ध्यबाया भरय् चुनाव त्याकेगु व सिद्धान्त व छुं दर्शनया लिधंसाय् प्रचारयात न्हयःने यंकेगु स्वया नं जागिर बीगु, मिसा मिले याना बीगु, इहिपा याकेगु व ध्यबाया लोभ क्यनाः वा भ्वय् नकाः ध्यबा खर्च यानाल् चुनाव त्याकेगु गलत सोच न्ह्यःने वःगुलिं नं थ्व इलय् सच्चा मनूत मत्याःगु खः ।

सम्बन्धित बुखँ

LEAVE YOUR COMMENTS