फेसबुक, इन्स्टाग्राम, ह्वाट्स ऐप व म्यासेन्जरया म्यासेज सेवायात छथाय् हयेगु तयारी सुरु जूगु दु । सामाजिक सञ्जालय् तसकं लोकंह्वानाच्वंगु थुपिं एपतय् छथाय् हयेगु धाःसां थुपिं बिस्कं बिस्कं हे एप जुयाच्वनी, तर छगू एपं मेगु एपय् म्यासेज छ्वयेगु कथं प्लेटफर्म दयेकेगु निंतिं तयारी सुरु जूगु खः ।

फेसबुकं थ्व ज्या यायेत ताः ई काइतिनि धाःसां ज्या धाःसा न्ह्याकेधुंकूगु दु । थ्व योजनाय् फेसबुकया संस्थापक मार्क जुकरबर्गं विशेष ध्यान बियाच्वंगु खँ धाःगु दु । फेसबुकया थ्व योजना सफल जुल धाःसा फेसबुकय् हे च्वनाः मेम्हेसित ह्वाट्स एप वा इन्स्टाग्रामय् म्यासेज छ्वयेफइ । थौंकन्हय् धाःसा थ्व सम्भव मदु, छाय्धाःसां थ्व स्वंगुलिं ऐपं बिस्कं बिस्कं हे ज्या याइ, अले थुमिगु साझा प्लेटफर्म मदुनि ।

फेसबुकया थ्व योजना सफल जुल धाःसा फेसबुकय् हे च्वनाः मेम्हेसित ह्वाट्स एप वा इन्स्टाग्रामय् म्यासेज छ्वयेफइ

न्यूयोर्क टाइम्सं पितबिउगु खबर कथं सन् २०२० तकया दुने थ्व स्वंगुलिं एप थःथवय् स्वायेगु ज्या जुइफु । न्यूयोर्क टाइम्सं हे दकलय् न्हापां थुपिं सामाजिक सञ्जालतय् साझा प्लेटफर्म दयेकेगु निंतिं ज्या सुरु जूगु खबर बिउगु खः । थथे साझा प्लेटफर्म तयार यायेफत धाःसा अप्वः मनूत थुपिं हे सञ्जालय् झुमे जुयाच्वनी, अप्वः ई थुपिं हे ऐपय् छ्याइगु जुइ ।

थ्व हे कारणं जुकरबर्ग थ्व प्लेटफर्म याकनं दयेकेत हथाय् चायाच्वंगु खः ।थ्व प्लेटफर्म दयेकेफत धाःसा कम्पनीया प्रयोगकर्तात नं अप्वइगु व गुगल व एप्पलेया म्यासेज सेवाया लिसे टक्कर कायेगु निंतिं फेसबुकयात बल्लाःगु तिबः दइगु अनुमान जुयाच्वंगु दु । फेसबुकं छगू वक्तव्य जारी यासें थःपिनगु म्यासेज सेवायात बांलाकेगु निंतिं बिस्कं बिस्कं प्लेटफर्मय् थः पासापिं लिसे स्वापू तयाच्वने फयेकेगु निंतिं कुतः यानाच्वनागु खँ धाःगु दु ।

जुकरबर्गया थ्व योजनां फेसबुक कम्पनी दुने धाःसा तनावया स्थिति ब्वलनाच्वंगु खँ नं न्यूयोर्क टाइम्सं धाःगु दु । थगुने इन्टाग्राम व ह्वाट्सऐपया संस्थापकतय्सं कम्पनी त्वःतावंगु कारण नं थ्व हे खः धाःगु दु । थुपिं ऐपत छथाय् स्वायेबलय् प्रयोगकर्तातय् गोप्यता ल्यंकातयेगु निंतिं गुकथं ज्या याइ धयागु न्ह्यसः ब्वलनाच्वंगु दु ।

सम्बन्धित बुखँ

LEAVE YOUR COMMENTS