ने. सं. ११४४ चौलागा दुतिया -

जिमिगु ज्वः, ओली व प्रचण्ड थें मजुइमा

रमेश प्रसाइँया दोहरी म्येँ थौंकन्हय् युट्य्बय् तसकं च्यानाच्वंगु दु। रमेश प्रसाइँनं मिखां मखं । तर वय्कः धुरन्धर बोलक्कड । अनेक विषयय् धाराप्रवाह नवाये फु। नवाइगु विषयप्रति नं उतिकं पकड दु। थौंकन्हय् वय्कःया इहिपाया खँ प्रचारय् वयाच्वंगु दु। छम्ह मय्जुलिस्य यःत्यः नं जुइधुंकूगु खनेदु। रमेश प्रसाइँ व यःत्यः जूम्ह मय्जुलिस्य दोहरी म्येँया ज्याझ्वः थौंकन्हय् युट्युबय् वयाच्वं ।

रमेश प्रसाइँयाके दोहरी म्येँ हालेगुलिइ नं उतिकं प्रतिभा खनेदु। मिखा मदुसां रमेश प्रसाइँनं थःगु विशेष क्षमता पूर्णरुपं प्रस्तुत यायेत सफल जूगु दु। अक्षम व अपांग धकाः म्हिगः थें विभेद यायेगु ई मखयेधुंकल । ल्हाः, तुति, मिखा मदुपिंसं नं थौं विश्वय् असाधारण क्षमता क्यनाच्वंगु दु। थौं अपांग खँग्वः छ्यलेगु उचित मतायेकेधुंकल ।

उकिया थासय् ‘फरक क्षमता दुपिं’ धायेगु याना हयाच्वंगु दु। फरक क्षमता दुपिनि पहिचानयात कयाः थौं अलग हे साहित्यया धाः न्ह्यायेधुंकूगु दु। रमेश प्रसाइँया प्रतिभां फरक क्षमता दुपिनि खूबी गुलि ग्यं, ग्यनेफु प्रमाणित याइ । रमेश प्रसाइँ व वय्कःया इहिपा जुइम्ह मय्जु दथुइ जूगु दोहरी म्येँया छझ्वलं अतिकं च्वास्स मिनी । व झ्वः म्येँया रुपय् रमेशजुं पे्रम प्रसंगय् धाःसां उकिं थ्वयेकूगु थौंया राजनीतिक ग्यंग्यं नुगलय् थिल । रमेशं थः मय्जुयात म्येँ हालेगु झ्वलय् धाइ, ‘झीगु जोडी ओली व प्रचण्डया जोडी थें मजुइमा ।’ थौंया राजनीतिइ ओली व प्रचण्डया जोडीं गज्याःगु राजनीतिक छाप जनताय् लाकाच्वंगु दु धइगु खँ थुकें व्यक्त याना क्यनी । थौं ओली व प्रचण्डया राजनीतिक ख्यलय् खने दुगु कचिंगः, ल्वापु, वैमनस्यतां देय् या आम जनताया दथुइ घृणाया विषय जुइधुंकूगु दु। थज्याःगु क्वह्यंगु ल्वापु, दुष्मनी सुयागुं दथुइ नं मदयेमा, मनूतय्सं व्यक्त याना हयाच्वंगु दु ।

थौंकन्हय् मनूत ल्वानाच्वन कि ‘खिचात ल्वाःथें ल्वानाच्वन’ मधासे ओली व प्रचण्ड थें ल्वानाच्वन धकाः नागःतुगः याइगु जुइधुंकल । जनतां अनुभव यानाच्वंगु थ्व देय्या शीर्षस्थ नेतातय् स्वापू गुगु तँय् थ्यनेधुंकल थ्व नवनिर्मित ल्वापुखिचाया प्रतिक उपमां क्यनी ।

रमेश प्रसाइँ नं दोहरीया प्रसंगय् थःपिनिगु जोडी ओली व प्रचण्डया थें मजुइमा धकाः धाःसां थौं ओली व प्रचण्डया जोडी देय्या निंतिं चिन्ताया विषय जुइधुंकल । थ्व जोडीया दथुइ थौं राजनीतिक ख्यलय् खने दयाच्वंगु कलहं देय् गन थ्यनीगु खः, जनता आजित जुइधुंकल । थौंकन्हय् मनूत ल्वानाच्वन कि ‘खिचात ल्वाःथें ल्वानाच्वन’ मधासे ओली व प्रचण्ड थें ल्वानाच्वन धकाः नागःतुगः याइगु जुइधुंकल । जनतां अनुभव यानाच्वंगु थ्व देय्या शीर्षस्थ नेतातय् स्वापू गुगु तँय् थ्यनेधुंकल थ्व नवनिर्मित ल्वापुखिचाया प्रतिक उपमां क्यनी ।

थौं देय्या राजनीति अजू चायापुगु खँ खः । छखेर उच्चस्तरय् सत्तासीन दलया निम्ह अध्यक्ष दथुइ काटामार । वाकयुद्ध चरमावास्थाय् । मेखेर ध्वंत ती हू हाली थें क्वय्या नेतातसें छप्वाः म्हुतुं धाये थें ‘पार्टी गुगुं हालतय् नं तज्याइगु मखु, छप्पँ जुयाः वनी । पार्टी कुचा थलेत देशी विदेशी षडयन्त्र जुयाच्वंगु दु। तर नेकपां थज्याःगु षडयन्त्रयात असफल यानाः त्वःती । विश्वय् थःत नमूना कम्युनिष्ट शासन सिद्ध यानां त्वःती ।’ नेकपाया छथ्वः नेतातय्सं धाइ ‘कम्युनिष्ट पार्टीइ बहस, छलफल वैचारिक चिन्तन, अभ्यास जुइगु स्वाभाविक खः । अध्यक्षद्वय दथुइ जूगु वैचारिक बहसयात शत्रुसंवाद खंकेगु गलत खः । थ्व नेकपाया एकता खनाः ग्याःपिनिगु दुस्प्रचार जक खः ।’

तर शीर्षस्थ निम्ह नेतातय् दथुइ खने दुगु ल्वापुं नेकपा धइगु निम्ह नेताया पार्टी जक खः, अन दुने मेमेपिं नेतातय् अस्तित्व नं दु धइगु खँ जनतां बोध याये फयाच्वंगु मदु। नेकपा थौं निगू पार्टी थें खने दयेधुंकल । न वैचारिक समानता, न संरचनात्मक एकता । जबरजस्त एकताया हौवा सृजना यानाः शक्तिइ वये फइ । तर शक्तिया सदुपयोग यानाः देय् व जनताया कल्याण याये फइमखु। थ्व थौंया नेकपाया एकतां क्यना बिउगु दु। थौं नेकपा दुनेया ल्वापुया खँ मखु ।

न्ह्यसः, चिन्ता, देय् व जनताया जुइ । गुगुं नं दल शक्तिइ वइ । वया दायित्व जनताप्रति जुइ । देय्यात रुपान्तरण यायेगुपाखे जुइ । नेतात खिचा ल्वाःथें ल्वानाः देय्या विकास गबले जुइगु खः । देशं थौं हरदृष्टिं अराजक स्थितिइ लायेधुंकूगु दु। राज्यविहीन अवस्थापाखे न्ह्याः वनाच्वंगु दु। देश, जनताया आधारभूत आवश्यकता चूलाकाः विकासपाखे न्ह्याकेगु ला गन गन, थथे हे जूसा नये त्वने मखनाः देशय् लुटमार जुइत बेर मदु। ‘छिगु कार्यकालय् छु छु विकास जुल’ धकाः प्रम ओलीयात छगू अन्तर्वार्ताय् न्यनी । प्रधानमन्त्री थम्हं यानागु विकासया धलखय् ‘दरवार हाइस्कुलया पुनःनिर्माण, रानीपुखूया नवनिर्माण न्ह्यथनी । देय् व जनताया निंतिं विकास छु गज्याःगु जुइ, जुइमाः धइगु भ्याः भचा हे अवधारणा, ज्ञां मदुपिं नेतातपाखें थ्वयां अप्वः मेगु लिसः छु आशा याये फइ ?’

अन्तय् रमेश प्रसाइँ नं लोक दोहरी म्येँ कासाय् थःगु इहिपा लिपा थःगु जोडीया स्वापू ओली व प्रचण्डया थें मजुमा धकाः गुगु कामना यानादिल, व पूवनेमा । शुभकामना ।