ने. सं. ११४४ कछलागा पञ्चमी -

ट्रम्पया अमानवीय व्यापार नीति

अमेरिकी राष्ट्रपति डोनाल्ड ट्रम्प राष्ट्रपति जुइ न्ह्यः छम्ह व्यापारी खः । अर्बपति व्यापारी ट्रम्प राष्ट्रपतिइ त्यायेधुंकाः अमेरिकी कुटनीति नं व्यापारं निर्देशित जुया वयाच्वंगु दु । राष्ट्रपति जूगु छुं ई लिपा हे ट्रम्पं चीन लिसें युरोप, क्यानाडालिसे व्यापार युद्ध हे सुरु याःगु खः ।

‘अमेरिकी फस्र्ट’ (अमेरिकी जनता दकलय् न्ह्यःने) धयागु नारा बियाः ट्रम्पं उद्योग–व्यवसायय् जक मखु राजनीति, कुटनीति, वातावरण, स्वास्थ्य हरेक क्षेत्रय् व्यापार नीतियात प्राथमिकता बिया वयाच्वंगु दु । हरेक क्षेत्रय् अमेरिकायात लबः दइगु कथं व्यापारिक दृष्टिं स्वयेगु यानाच्वंगु खः ।

थथे व्यापारिक दृष्टि स्वयेगु यानाच्वंम्ह ट्रम्पं आः मानवीयता तकं व्यापारया हे दृष्टिं स्वःगु दु । थुकिया ज्वलन्त उदाहरण खः ट्रम्पया साउदी अरब व साउदी युवराज सलमानयात कयेच्यायेगु नीति । साउदी अरब व साउदी युवराज थौंकन्हय् पत्रकार जमाल खाशोज्जीया हत्या लिपा विश्वन्यंकं आलोचित जुयाच्वंगु दु ।

खाशोज्जीया हत्यायात विश्वया नेतात लिसें विश्वन्यंकंया सञ्चार माध्यमतय्सं अमानवीय हत्याकाण्ड धकाः आलोचना यानाच्वंगु दु । साउदी अरबयात कुंखिनाः लेख च्वया वयाच्वंगु कारणं हे जक खाशोज्जीया हत्या जूगु खँ पिहां वयाच्वंगु दु । थुकी प्रत्यक्ष रुपं साउदी युवराज समालनया ल्हाः दु धयागु खँ अमेरिकी गुप्तचर एजेन्सी सिआइएं तकं धायेधुंकूगु दु ।

तर अमेरिकी राष्ट्रपति ट्रम्पं थज्याःगु न्ह्याथे जाःगु खँ सार्वजनिक जूसां थःम्हं साउदी अरबयात त्वःते फइमखु धकाः तप्यंक हे धायेधुंकूगु दु । ट्रम्पया थ्व धापू पूवंक हे वं नालाच्वंगु व्यापार नीतिया कारणं हे वःगु खः धयागु खँय् सुयां शंका मदु । साउदी लिसे अमेरिकाया दया वयाच्वंगु अर्बौं डलरया व्यापारयात ध्यानय् तयाः हे ट्रम्पं साउदीं याःगु अमानवीय ज्याय् नं मिखा तिस्सिया बिउगु दु ।

पत्रकार खाशोज्जीया हत्या इस्तानबुलय् च्वंगु साउदी अरबया महावाणिज्य दूतावासय् जूगु खः । थः कलाःलिसेया पारपाचुकेया भ्वं दयेकेग निंतिं दूतावास वंम्ह खाशोज्जीयात साउदी एजेन्टतय्सं दूतावास दुने हे स्यानाबिउगु खः । न्हापा ला साउदीं खाशोज्जया हत्या जूगु खँ तकं अस्वीकार याना वयाच्वंगु खःसा विश्व समुदाय व सञ्चार माध्यमया तःधंगु दबाब लिपा साउदीं दूतावास दुने हे खाशोज्जीया हत्या जूगु स्वीकार याःगु खः ।

थ्व हत्याया इलय् साउदी एजेन्ट व खाशोज्जी दथुइ जूगु खँल्हाबल्हा रेकर्ड नं जुयाच्वंगु दु । अमेरिकी राष्ट्रपति ट्रम्प थम्हं हे थ्व अडियो तसकं भयावह व दर्दनाक जूगु खँ धया वयाच्वंगु दु । अले थ्व हत्यायात कयाः विश्वं साउदी अरबयात बेक्वः मिखां स्वयाच्वंगु दु । थज्याःगु इलय् राष्ट्रपति ट्रम्प साउदीया कवच जुयाः वयागु रक्षाया निंतिं न्ह्यःने वयाच्वंगु दु ।

ट्रम्पं छगू वक्तव्यय् पितबियाः अमेरिका साउदी अरबलिसे दु धकाः धाःगु दु । साउदी व साउदी युवराज सलमानं याःगु अमानवीय ज्यायात खिचा खि त्वपुइथें त्वपुयाः ट्रम्पं धाःगु दु, ‘जुइफु सउदी पत्रकार खाशोज्जीया हत्याया बारे युवराज सलमानं फुक्कं सिउगु नं जुइफु, शायद मसिउगु नं जुइफु । तर न्ह्यागु जूसां अमेरिका साउदी अरब लिसे दु ।’

खाशोज्जीया हत्यायात कयाः विश्वं साउदीयात शंकाया मिखां स्वयाच्वंबलय् ट्रम्प थुकथं खुल्ला रुपं साउदीया पक्षय् वःगु छगू प्रमुख कारण धयागु साउदी अरबं अमेरिकाय् याना वयाच्वंगु लगानी खः । ट्रम्पया हे कथं साउदी अरबं अमेरिकाय् जक ४५० अर्ब डलर लगानी यानातःगु दु । थुलि जक मखु अमेरिकाया प्रमुख आयश्रोत जुयाच्वंगु हतियारया छगू मू खरिदकर्ता नं साउदी हे जुयाच्वंगु दु ।

थ्व ल्याखं अमेरिकाया अर्थतन्त्रय् सउदी अरबया बांलाःगु योगदान दयाच्वंगु दु । अथे जूगुलिं अमेरिका साउदीयात तंचायेके चाहे जुयाच्वंगु मदु । उकिसनं ट्रम्प झन हरेक ज्या व्यापारिक दिमागं याना वयाच्वंगु खः । उकिं ट्रम्प मानवीयतायात हे छखे तयाः साउदीं याःगु अमानवीय ज्यायात नं मिखा तिस्सिना समर्थन यानाच्वंगु दु ।

खय्त ला ट्रम्पं साउदीयात समर्थन यायेमाःगु कारण कट्टरपन्थी मुस्मांतय् विरु अमेरिकां न्ह्याकाच्वंगु युद्धय् साउदी बियाच्वंगु क्वातुगु साथया कारणं नं खः धयाच्वंगु दु । तर मू कारण धाःसा साउदीं अमेरिकाय् यानातःगु लगानी व अमेरिकी हतियारया मू खरिदकर्ता जूगुलिं हे खः । थुकिं शंका यायेथाय् मदु ।

खय्त ला ट्रम्पं राष्ट्रपति जूगु छुं ई लिपा हे संवेदनहीन आदेश बिउगु खः । जात, धर्म, रंग स्वयाः ट्रम्पं न्हय्गू देय्या नागरिकतय्त अमेरिका वयेत प्रतिबन्ध तयेगु आदेश बिउगु खः । तर अमेरिकी जनता व अमेरिकी अदालतं हे ट्रम्पया थ्व आदेशयात अस्वीकार यानाबिल । आः नं साउदीया अमानवीय ज्यायात ट्रम्पया थ्व संवेदनहीन समर्थनयात अमेरिकी जनता व विश्वं समर्थन याइमखु, थ्व पक्का खः ।