
येँ / विश्वया दकलय् तजाःगु च्वापुगुँ सगरमाथाया जाः (उचाइ) ८,८४८.८६ मिटर जूगु दु । म्हिगः नेपाः व चीनं मंकाः कथं सगरमाथाया न्हूगु जाः घोषणा याःगु खः । थ्व ल्याखं आः सगरमाथाया जाः ८६ सेन्टिमिटर अप्वः जूगु दु । थ्वयां न्ह्यः विश्वं सगरमाथाया जाः ८८४८ मिटर नाला वयाच्वंगु खःसा चीनं धाःसा ८८४४ मिटर जक दु धया वयाच्वंगु खः ।
परराष्ट्र मन्त्री प्रदीप ज्ञवालीं म्हिगः नापी विभागय् पत्रकार सम्मेलन यासें सगरमाथाया न्हूगु जाः घोषणा याःगु खः । नेपाः व चीनया सर्भेयरतय्सं अलग अलग हे सगरमाथाया जा नापे याःगु खःसा निगू देय्या सर्भे अधिकारीतय्सं जाःयात कयाः मंकाः प्रशोधन यासें अन्तिम रुप बिउगु खः । थुकियात नेपाःया मन्त्रिपरिषद् बैठकं मंसिर १० गते अनुमोदन याःगु खः । नेपालं सगरमाथाया जाः नापे याःगु थ्व हे न्हापांखुसी खः ।
वंगु दँय् चिनियाँ राष्ट्रपति सी जिनपिङं नेपाःया भ्रमण याःगु इलय् निगुलिं देशं मंकाः कथं सगरमाथाया जाः घोषणा यायेगु समझदारी याःगु खः । नेपालं सन् २०१७ या अन्त्यपाखें निसें जाः नापे यायेगु ज्या न्ह्याकूगु खःसा चिनियाँ राष्ट्रपतिलिसेया समझदारी लिपा चीन नं थ्व अभियानय् संलग्न जूवःगु खः ।
नापी विभागया कथं निगुलिं देय्पाखें सर्वेक्षण ज्या क्वचायेधुंकाः उकिं वःगु तथ्यांक प्रशोधन यानाः प्राविधिक व निर्देशक समितिया तहलय् सहलह लिपा मंकाः कथं सगरमाथाया जाः क्वःछिउगु खः । थ्वहे दथुइ निवाः न्ह्यः मन्त्रिपरिषदं उचाइ मापनय् सहभागी कर्मचारीतय् योगदान व कदरयात हनेगु निर्णय नं यायेधुंकूगु दु ।
LEAVE YOUR COMMENTS