आखिर गनं म्हिताच्वन थ्व खेल ?

येँ – उपसभामुख शिवमाया तुम्बाहाम्फें थःगु पार्टीया वरिष्ठ नेतातय्सं धालं तकं पदं राजीनामा मबिउगु कारणं मुक्कं प्रतिनिधिसभा हे प्रभावित जुयाच्वंगु दु । तर वय्कलं धाःसा थःगु कारणं संसद प्रभावित जूगु मखुसें पार्टीया नेतातय्सं सभामुख बारे निर्णय याये मफुगुलिं सदन प्रभावित जूगु द्वपं बियादीगु दु ।

गुलि धालं नं राजीनामा मबिउगु कारणं म्हीग वय्कःयात वालुवाटार सःताः प्रधानमन्त्री लिसें पार्टी अध्यक्ष केपी ओली व मेम्ह अध्यक्ष पुष्पकमल दाहालं सम्झे यानादीगु खः । तर तुम्बा–हाम्फें नेतातय्गु खँया अन हे अस्वीकार यानादिल । आखिर तुम्बाहाम्फेयात पार्टीया वरिष्ठ नेतातय्गु आदेश तकं पालना मयायेगु थपाय्धंगु उर्जा गनं प्राप्त जुयाच्वन ले ? विज्ञ सूत्रतय्सं धाःकथं तुम्बाहाम्फेयात पार्टी नेतातय्गु आदेश तकं पालना मयायेगु थ्व शक्ति राष्ट्रपति विद्यादेवी भण्डारीपाखें प्राप्त जुयाच्वंगु खः । राष्ट्रपति भण्डारीं तुम्बाहाम्फेयात हे न्हूम्ह सभामुख दयेकेमाः धकाः ताः ई न्ह्यवंनिसें ‘सुझाव’ छ्वया हयाच्वंगु खः । तर उकियात पार्टीं स्वीकार धाःसा यानाच्वंगु मदु । तुम्बाहाम्फें राष्ट्रपतिया हे हःपाः दयाः थपाय्धंगु अडान कयाच्वंगु सूत्रया दावी दु ।

तर पूर्व माओवादीलिसे सतीगु सूत्रतय्सं धाःसा तुम्बाहाम्फेयात थथे अडान कायेकेगु लागिं पूर्व एमालेतय्सं हे खेल म्हिताच्वंगु द्वपं बिउगु दु । सभामुख पद न्ह्याथे यानाः नं पूर्व एमालेतय्गु ल्हातय् लाकेगु लागिं शिवमाया तुम्बाहाम्फेयात राजीनामा मबीकुसे तयातःगु उमिगु दावी दु । थ्वहे झ्वलय् उपसभामुख तुम्बाहाम्फें थःगु कारणं संसद अवरुद्ध जुयाच्वन धाःगु खँयात खण्डन यानादीगु दु । पार्टीं सभामुखया निर्णय याये मफुगु कारणं संसद अवरुद्ध जुयाच्वंगु द्वपं बिसें वय्कलं पार्टीं सभामुख सु जुइगु खः धइगु खँ क्वःछीसातं थम्हं राजीनामा बीगु खँ कनादीगु दु ।

लिसें वय्कलं सदनय् सभामुख मदयाच्वंगु इलय् थम्हं नं राजीनामा बिल धाःसा संसद नेतृत्वविहिन जुइगु अवस्था वयेफु धकाः राजीनामा मबियागु खँ नं धयादीगु दु । पिने धाःसा वय्कःयात अडानयात गाक्कं जनसमर्थन प्राप्त जुयाच्वंगु दु । सामाजिक सञ्जालय् वय्कःयात यक्वस्यां तारिफ याना हःगु दु ।

कांग्रेसया विरोध
उपसभामुख तुम्बाहाम्फेया राजीनामा मवःगु व मेखे सत्तारुढ दल नेकपां सभामुख सु जुइ धकाः निर्णय याये मफुगु कारणं संसद धाःसा लगातार अवरुद्ध जुयाच्वंगु दु । वंगु छुं न्हि न्ह्यवंनिसें सुचं तिकाः संसद स्थगित यायेमाःगु अवस्था जुयाच्वंगु दु । प्रमुख प्रतिपक्षी नेपाली कांग्रेसं थुकिया विरोध यासें छगू पार्टीया कारणं संसदयात अनिर्णयया बन्दी दयेके दइ मखु धयाहःगु दु ।

सत्तारुढ दलं सभामुख चयन याये मफुगु कारणं यानाः संसद हे चले याके बियाच्वंगु मदु । थुकिं यानाः संसदया सार्वभौमसत्तायात हे हाथ्या बीगु ज्या जुल धासें कानून बमोजिम संसद चले याये माल धकाः इनाप याना हःगु दु । कांग्रेसं सत्तारुढ दलं सभामुख ल्यये मफुगु ज्यायात कयाः नागःतुगः यासें आलोचना याना हःगु दु । संसद दुने धाःसा कांग्रेसपाखें नं थुकियात कयाः छुं यानाच्वंगु मदु ।

सम्बन्धित बुखँ

LEAVE YOUR COMMENTS