ने. सं. ११४६ बछलागा तृतीया -

सासः कुनाः मां व मचा सित

येँ (नेपालभाषा टाइम्स) – बौद्धय् छम्ह मिसा व वया लछि दुम्ह मचा सिनाच्वंगु अवस्थाय् लूगु दु । नयाँपाटी च्वना वयाच्वंम्ह पेम्बी शेर्पा लछि दुम्ह म्ह्याय्लिसें सिनाच्वंगु अवस्थाय् लूगु खः । लिसें पेम्बीया भाःत दोर्जे शेर्पा धाःसा अचेत अवस्थाय् लूगु खँ महानगरीय प्रहरी वृत्त बौद्धं जानकारी बिउगु दु । दोर्जेया नेपाल मेडिकल कलेजय् वासः जुयाच्वंगु दु । बहनी द्यनेगु झ्वलय् हिटर च्याकाः द्यंगु व अक्सिजनया कमिं यानाः सीगु आशंका प्रहरीं याःगु दु। झ्याः व खापा फुक्कं तिनातःगुलिं सासः कुनाः सीगु अनुमान प्रहरीं याःगु दु । उगु छेँय् शेर्पा तिपू किराना पसः तयाच्वंपिं खः । म्हिगः सुथय् छेँथुवाःयात सामान मालाः सःतः वंगु खःसा सुनां नं न्वमवायेवं प्रहरीयात खबर याःगु खः । प्रहरीं कोठा तछ्यानाः स्वःबलय् मां म्ह्याय् सिनाच्वंगु व अबुम्ह छटपटे जुयाच्वंगु अवस्थाय् लुइकूगु खः ।