संशोधन विधेयक दर्ता जूसा जक हडताल लित

येँ – आन्दोलनरत चिकित्सकतय्सं सरकारं मुलुकी ऐन संहिता संशोधनया निंतिं संसदय् दर्ता जुल धाःसा जक आन्दोलन लित कायेगु खँ धाःगु दु । सरकार व आन्दोलनरत चिकित्सक संघ दथुइ सोमवाः जूगु वार्ता सकारात्मक जूसां संशोधन प्रस्ताव दर्ता मयायेकं आन्दोलन लित मकायेगु खँ चिकित्सक संघया पदाधिकारीतय्सं धाःगु खः ।

सोमवाः नेपाल चिकित्सक संघया पदाधिकारी व स्वास्थ्य राज्यमन्त्री डा. सुरेन्द्र कुमार यादव दथुइ वार्ता जूगु खः । वार्ताय् सरकार चिकित्सकतय् माग कथं कानून संशोधन यायेत तयार दुगु खँ धाःगु खः । राज्यमन्त्री यादवं चिकित्सकतय् माग सम्बोधन यायेत सरकार तयार दु धासें थुकिया निंतिं कानून मन्त्रालयलिसे समन्वय यानाः संशोधन प्रस्ताव छ्वयेगु खँ धाःगु दु ।

वय्कलं थौं हे संशोधन वनीगु व चिकित्सकतय् आन्दोलन नं लित काइगु आशा प्वंकादीगु दु । चिकित्सक संघया अध्यक्ष डा. मुक्तिराम श्रेष्ठं संसदय् संशोधन दर्ता जूगु छगू निगू मिनेट लिपा हे थःपिंसं आन्दोलन लित कायेगु जुइ धयादीगु दु ।

वय्कलं उपचारया झ्वलय् विरामी सित धाःसा डाक्टरयात जन्मकैद याइगु कानून संसारया छुं हे देशय् मदु धासें उकिया विरोध यायेमाःगु खँ कनादीगु दु । डाक्टर हडतालं यानाः अस्पतालय् इमर्जेन्सी बाहेक मेगु सेवा बन्द जुयाच्वंगु दु ।

सम्बन्धित बुखँ

LEAVE YOUR COMMENTS