देउवाया धापूयात नेकपाया लिसः

येँ – प्रमुख प्रतिपक्षी नेपाली कांग्रेसया सभापति शेरबहादुर देउवां भारतं जारी याःगु न्हूगु नक्साय् प्रधानमन्त्री ओलीया नं अप्रत्यक्ष सहमति दयेमाः धकाः न्ववानादीगु धापूयात कयाः विवाद पिहां वःगुद ु । सत्तारुढ नेकपाया प्रवक्ता लिसें पूलांम्ह परराष्ट्र मन्त्री नारायणकाजी श्रेष्ठं भारतं नेपाःया सीमा क्वत्यलाः दयेकेगु नक्साया बारे पुलांम्ह प्रम देउवां न्ववाःगु खँयात न्ह्याक्व निन्दा याःसां मगाः धयादीगु दु ।

उकथं हे सरकारया प्रवक्ता लिसें सञ्चार मन्त्री गोकुल बास्कोटां नं देउवाया द्वपंयात चुनावी मसला धासें प्रम ओलीया राष्ट्रवादयात कयाः न्ह्यसः थनेगु लज्जापुइगु खँ खः धयादीगु दु । वय्कलं देउवा थः सत्ताय् दुगु इलय् भारतलिसे याःगु सम्झौताकयाः न्ह्यसः थनादिसें ओलीया राष्ट्रवादी अडान, क्षमता व संघर्षया खँय् न्ह्यसः थनेगु हे लज्जा चायापुगु ज्या खः धयादीगु दु ।

मेखे कांग्रेसया नेतातय्सं धाःसा देउवाया बचाउ यासें सीमा विवादय् प्रधानमन्त्री उदासीन खनेदुगुलिं अज्याःगु अभिव्यक्ति वःगु खयेमाः धाःगु दु । पुलांम्ह परराष्ट्रमन्त्री डा. प्रकाशशरण महतं सीमा विवादय् प्रधानमन्त्री उदासिन जूगुलिं अज्याःगु अभिव्यक्ति वःगु बिचाः तयादिल ।

तर देउवाया बारे कांग्रेसया हे नेता शेखर कोइरालां धाःसा बिस्कं बिचाः तयादीगु दु । वय्कलं थज्याःगु विषयय् पुलांम्ह प्रधानमन्त्री थेंज्याःम्ह जिम्मेवार मनुखं प्रधानमन्त्री लिसे च्वनाः वार्ता यायेमाः तर राष्ट्रियताया विषयसं छम्हेस्या मेम्हसित द्वपं बीगु स्वयां समाधानया लँपुइ न्ह्यचिलेमाःगु खँ धयादीगु दु ।