ने. सं. ११४४ ञलाथ्व नवमी -

पेट्रोल भारतय् मियाः खालीगु ट्यांकर जक नेपालय्

येँ – ट्यांकरथुवाःतय्गु हे मिलोमतों नेपालय् दुहां वइगु पेट्रोलियम पदार्थ दथुं हे हाकनं भारतपाखे तस्करी जुयाच्वंगु खँ सीदुगु दु । नेपाल आयाल निगमया कथं नेपालय् स्वयां भारतय् पेट्रोलियम पदार्थया भाः थिके जूगुलिं थुकथं तस्करी अप्वयाच्वंगु खः । निगमं थुकिया बारे थःपिंसं छानबिन सुरु यायेधुनागु खँ धाःगु दु । छानबिनया झ्वलय् दकलय् न्हापांगु चरणय् ट्यांकर व्यवसायी व सम्बन्धित पेट्रोल पम्प व्यवसायीतय्के लिखित लिसः फ्वनागु खँ पूर्वाञ्चल क्षेत्रीय प्रमुख भानुभक्त खनालं कनादीगु दु । वय्कलं बीबीसीलिसे खँ ल्हासें धयादीगु दु, ‘सत्यतथ्य विवरण पेश यायेत सम्बन्धित ट्यांकरधनीयात स्पष्टीकरण न्यनागु दु । उमिसं मिउगु खः कि मखु जाँच यायेगु जुइ ।’

भारतीय बजारय् थौंकन्हय् पेट्रोलया भाः नेपालय् स्वयां २२ तका व डिजेलया भाः २८ तक अप्वः दु । उकिं भारतं दुहां वइगु पेट्रोल हाकनं अन हे तस्करी जुयाच्वंगु खः । ट्यांकरतय्सं नेपाःया लागिं धकाः हःगु डिजेल व पेट्रोल भारतय् हे मियाः नेपालय् खालीगु ट्यांकर जक दुत हयेगु यानाच्वंगु दु । लँय् लँय् ट्यांकरया तौल नापे यायेगु वेट मेशिन मदुगु व सीमा सुरक्षाकर्मीलिसे नं निगमया समन्वय मदुगुलिं तस्करी पनेत थाकुयाच्वंगु दु । तस्करीया कारणं बजारय् पेट्रोलियम पदार्थया माग तसकं अप्वयेवं निगमं छानबिन सुरु याःगु खः । निगमं आः देय्न्यंकंया नाकाय् सुरक्षा व्यवस्था कडा यानागु खँ धाःगु दु । तस्करी अप्वया वन धाःसा व्यवस्थापन यायेत थाकुयाः आपूर्तिया समस्या जुइगु खँ निगमया अधिकारीतय्सं धाःगु दु ।