सिंगापुरय् प्रयोगशालाय् उत्पादित लायात स्वीकृति

एजेन्सी – सिंगापुरय् जनावरयात मस्यासे हे उत्पादन जुइगु ‘सफ ला’ उपभोग यायेगु निंतिं स्वीकृति बिउगु दु। थ्व स्वीकृति लिपा अमेरिकाया सान फ्रान्सिस्कोय् च्वंगु इट जस्ट नांया कम्पनीयात प्रयोगशालाय् उत्पादन याइगु खाया ला मीत लँ चाःगु दु ।

स्वास्थ्य, पशुकल्याण व वातावरण सम्बन्धी चिन्ताया कारणं पशुपंक्षी स्यायेनाः ला उत्पादन यायेगु विकल्पया माग जुया वयाच्वंगु खः । थज्याःगु इलय् सिंगापुरं बिउगु स्वीकृति तसकं महत्वपूर्ण जूगु खँ धाःगु दु । बार्क्लेजया कथं थज्याःगु वैकल्पिक लाया बजार वइगु दशकय् १४० अर्ब डलर तक थ्यनी, गुगु विश्वन्यंकंया ला उद्योगया कूल कारोवारया १० प्रतिशत जूवइ ।

वनस्पतिइ आधािरत लाया विकल्प थौंकन्हय् अमेरिकी, युरोपेली सुपरमार्के ट व रेष्टुराँया मेनुइ बियन्ड मिट वा इम्पसिबल फुडया नामं उपलब्ध दु । तर इट जस्टं उत्पादन याइगु ला धाःसा थुपिं स्वयां तसकं फरक जुइ । थ्व वनस्पतिइ आधारित ला मखु, बरु प्रयोगशालाय् जनवारया कोषया कृत्रिम वृद्धि यानाः उत्पादन याइगु ला खः । कम्पनीं सिंगापुरया निर्णय विश्वब्यापी खाद्य उद्योगया निंतिं तःधंगु उपलब्धी धासें मेमेगु देशं नं थज्याःगु स्वीकृति बिइगु आशा प्वंकूगु दु ।

थ्व दशकय् दर्जनौं कम्पनीतय्सं थज्याःगु ला उत्पादन यायेगु कुतः यानाच्वंगु दु। थुकी मध्ये दकलय् तःधंगु निगू कम्पनी इजराइलय् च्वंगु फ्युचर मिट टेक्नोलोजिज व बिल गेट्सपाखें समर्थिक मेम्फिस मिट्स खः । थुपिं निगुलिं कम्पनीं प्रयोगशालाय् उत्पादन याइगु दंगु व साःगु ला बजारय्ह येगु कुतः यानाच्वंगु दु ।

गुलिसिनं थज्याःगु उत्पादनं वातावरणयात फाइदा जुइगु धयाच्वंगु दुसा गुलिखे वैज्ञानिकतय्सं धाःसा छुं छुं अवस्थाय् वातावरणया निंतिं थ्व झन खराब जुइगु खँ धयाच्वंगु दु । न्ह्यागु जूसां प्रयोगशालाय् उत्पादन याःगु लां यक्व हाथ्या फयेमाली तिनि । छगू ला थज्याःगु लाया भाः तसकं थिके, मेगु आम उपभोक्तां थुकियात ययेकी कि ययेकी मखु धयागु स्वये ल्यं हे दनि ।