लकडाउनया न्हूगु मोडालिटी : पसः चायेकेदइगु, निजी सवारी साधनयात जोर-बिजोर

येँ – सरकारं वंगु चैत ११ गते निसें याःगु लकडाउनया मोडालिटी हिउगु दु । सरकारं कन्हय् निसें फुक्क पसः चायेकेबीगु व निजी सवारी साधनयात जोर-बिजोर प्रणाली कथं चले यायेबीगु निर्णय याःगु दु ।

बुधवाः बहनी च्वंगु मन्त्रिपरिषदया मुँज्यां कन्हय् निसें पसः चायेदइगु निर्णय याःगु खः । तर अज्याःगु पसतय्सं सुरक्षा मापदण्ड नालाकायेमाःगु खँ धाःगु दु । सरकारं जनजीवन सहज यायेगु कथं लकडाउनया मोडालिटी हिलेगु नितिं मन्त्रिपरिषदया मुँज्या च्वंगु खः ।

अथेहे निजी सवारी साधनयात जोर-बिजोर प्रणाली कथं चले यायेबीगु निर्णय नं मुँज्यां याःगु दु । निर्णय कथं जोर अंकया गते कुन्हु जोर नम्बरया सवारी साधन व बिजोर गते बिजोर अंकया सवारी साधन चले यायेबीगु निर्णय याःगु खः । निर्णय कथं चारपांग्रे सवारी साधनय् चालकबाहेक मेपिं निम्ह व मोटरसाइकलय् छम्ह जक च्वनाः चले यायेदइ । ताःहाकगु दुरीया सवारी साधनय् धाःसा अझ अनुमति मबिउनी ।

मन्त्रिपरिषदया विस्तृत निर्णयया बारे कन्हय् पत्रकार सम्मेलन यानाः जानकारी बिइगु खँ धाःगु दु ।