ग्राण्डीया कोरोना संक्रमित कर्मचारीयात पाटन अस्पताल भर्ना

येँ – कोरोना भाइरस (कोभिड-१९)या संक्रमण खनेदुम्ह ग्राण्डी इन्टरनेशनल अस्पतालय् ज्या याइम्ह कर्मचारीयात पाटन अस्पतालय् भर्ना याःगु दु ।

येँया धापासीइ च्वंगु ग्राण्डी अस्पतालं छगू विज्ञप्ति पिथंसें नेपाः सरकारया कोभिड-१९ निर्देशिका बमोजिम क्वारेन्टाइनया निंतिं नेपाः सरकारं क्वःछिनातःगु अस्पताल मध्ये पाटन अस्पतालय् संक्रमित कर्मचारीयात छ्वयाःगु खँ धाःगु दु ।

अस्पतालं ३५दँया कर्मचारीं थःगु स्वेक्षां पीसीआर चेक जाँच याःगु इलय् कोभिड पोजिटिभ खनेदुगु खँ धाःगु दु । नापं संक्रमित मनूया सम्पर्कय् वःपिं मनूतय् स्वाब संकलन यानाः लिच्वः मवतले आईसोलेसनय् तयातःगु खँ धाःगु दु । सम्पर्कय् वःपिं मनूतय् स्वाब परीक्षणया निंतिं टेकूया राष्ट्रिय जनस्वास्थ्य प्रयोगशालाय् छ्वःगु दु ।

ग्राण्डीया कर्मचारीयात म्हिगः कोरोना भाइरसया संक्रमण जूगु पुष्टि जूगु खः ।