ने. सं. ११४६ बछलागा चौथी -

न्हू पुखू दयेकूगु खर्च ९ करोड ३७ लाख तका

येँ (नेपालभाषा टाइम्स) – लानिपुखू (न्हूपुखू) पुनर्निर्माण उपभोक्ता समितिया सार्वजनिक लेखा परीक्षण सभा जूगु दु । वंगु सोमवाः जूगु सभाय् राष्ट्रिय पुनर्निर्माण प्राधिकरणया प्रतिनिधि नापं अनुगमन व समन्वय समितिया दुजःपिं येँ मनपा १, २७ व २८या वडा अध्यक्ष सहित पत्रकार व स्थानीयपिंसं ब्वति काःगु खः । समितिया नायः अजयरत्न स्थापितं लसकुस यानाः न्ह्याःगु सभाय् छ्याञ्जे रोशनकाजी तुलाधरं निर्माण कार्य प्रगति न्यंकूगु खः । अथेहे दांभरि होमप्रसाद खड्गीं ल्याःचाः न्यंकादीगु खः । सभाय् न्हू पुखू जक दयेकेत मुक्कं ९ करोड ३७लाख ८८ हजार ८० तका खर्च जूगु जानकारी बिउगु खः । ज्याझ्वलय् विज्ञ ई. राजुमान मानन्धर व वडा दुजः परिवेश वज्राचार्यं नं थःगु नुगःखँ तयादीगु खः ।