नगदेशय् शस्त्रपरित्याग दिवस हन
थिमि – नगदेश बौद्ध समूहया ग्वसालय् २२८१ क्वःगु शस्त्रपरित्याग दिवस तःजिक हन । समूहया ग्वसालय् मोहनि नखःया चालंया न्हिकुन्हु छगू तःजिक बुद्ध पुजा यासें सम्राट अशोकं शस्त्रपरित्याग यानाः निःशस्त्रीकरण अभियानयाया शुरुवात याःगु दिंयात लुमंकाः उगु दिवस हंगु खः । थाई भिक्षु श्रद्धेय मित्र महास्थविरं बियाबिज्याःगु पंचशील ग्रहण यासें बुद्ध पुजा ज्याझ्वः न्ह्याकूगु खः ।
समूहया अध्यक्ष दीपकराज साँपालया अध्यक्षताय् जूगु ज्याझ्वलय् उपाध्यक्ष रत्नभक्त हाँय्जुं लसकुस यानादीगु खःसा पाटी विहारं बिज्याःम्ह श्रद्धेय अनागारिका चम्पावती गुरुमां नं सम्राट अशोकया जीवनीया बारे कनाबिज्याःगु खः । समूहया सचिव कृष्णकुमार प्रजापतिं सम्राट अशोकं बुद्ध शासनिक ज्याय् बिउगु अविष्मरणीय ज्या व योगदानयात कयाः चर्चा यानादिल ।
सम्राट अशोकं कलिंगया युद्ध मैदानय् हे ल्वाभः, शस्त्रअस्त्र परित्याग यानाः श्रामणेर निग्रोधपाखें धर्मोपदेशया प्रेरणा कयाः बुद्ध शासनिक क्षेत्रय् दुहां वयाः सम्यक जीवन यापन यासें अहिंसाया धर्मय् लगे जूगु, निःशस्त्रीकरण अभियानया सुत्रधार जूगु, भगवान बुद्धया धर्मयात विश्वय् न्यंकेगु ज्याय् लगे जूगु थीथी देशय् तकं धर्म प्रचारक दूतया रुपय् भिक्षु संघयात छ्वःगु देश विदेशय् बुद्ध धर्मया प्रचारया निंतिं शिलास्तम्भ धस्वाकेगु ज्या याःगु कथं कायेगु याः ।
अथे हे सम्राट अशोकं राज्याभिषेक याःगु २० दँय् पवित्र बुद्ध जन्मभूमि लुम्बिनीइ अशोक स्तम्भ तयेके बिउगु, कपिलवस्तु स्थित कनकमुनि व क्रकुछन्द बुद्धया जन्मस्थलय् अशोक स्तम्भ तयेके बिउगु थेंज्याःगु ऐतिहासिक प्रमाण आतकं ल्यनाच्वंगु दु । थाई भिक्षु मित्र महास्थविरं सम्राट अशोकं याःगु अविष्मरणीय, चीर स्थायी जुइकथंया गतिविधि, ज्या व योगदानया बारे विस्तृत रुपं चर्चा याना बिज्याःगु खः ।
LEAVE YOUR COMMENTS