न्हूदँ समारोहपाखें थौं शंखधर दिवस हनीगु

येँ (नेपालभाषा टाइम्स) – नेपाल संवत्या प्रवर्तक शंखधर साख्वाःयात नेपाल सरकारपाखें राष्ट्रिय विभूति घोषणा याःगु न्हिया लुमंतिइ थौं शंखधर दिवस न्यायेकीगु जूगु दु। नेपाल संवत् न्हूदँ राष्ट्रिय समारोह समितिपाखें थौं सुथय् थनया जगत सुन्दर ब्वनेकुथिइ छगू ज्याझ्वः यासें थ्व दिवस हनेत्यंगु खः ।

ज्याझ्वलय् थीथी वक्तातय्सं शंखधर व वय्कलं नीस्वनादीगु नेपाल संवत्या बारे नुगःखँ तयादीगु खँ ग्वसाः खलकं धाःगु दु । ज्याझ्वलय् मूपाहां कथं येँ मनपाया मेयर विद्यासुन्दर शाक्य झायादी । येँ मनपापाखें वंगु शनिवाः तिनि छगू ज्याझ्वःया दथुइ येँया शंखधर उद्यान (पुलांगु रत्न पार्क) दुने शंखधर साख्वाःया झ्वाता पलिस्था यासें उलेज्या याःगु खः । वंगु न्हूदँया इलय् तिनि तोखाय् नं शंखधर साख्वाःया न्हूगु पलिस्था याःगु खः । आः तक देय्या थीथी लागाया २२ गू थासय् शंखधर झ्वाता पलिस्था जुइधुंकूगु दु ।