ताम्रकार समाजया मंकाः कय्तापुजा व मंकाः इहि

यल – ताम्रकार समाजया ग्वसालय् दँय्दसं थें थुगुसी नं मंकाः कय्तापुजा व मंकाः इहि ज्याझ्वः जुल । नेवाः समाजय् मयासे मजिउगु संस्कार व विधि व्यवहारया रुपय् कयातःगु उगु ज्याझ्वः समाजया सामाजिक व्यवहार व्यवस्था उपसमितिया ग्वसालय् जूगु खः ।

समाजया थःगु हे भवन जाउलाख्यलय् च्वंगु तमकःद्यःयाथाय् जूगु मंकाः कय्तापुजाय् झिंछम्ह मिजंमचा व मंकाः इहिइ झिंनिम्ह मिसामचाया सहभागिता दुगु खः । नेवाः परम्परा, संस्कार, विधि व्यवहारया संरक्षण, संवद्र्धनया निंतिं समाज न्ह्याबले लगे जुयाच्वनीगु अध्यक्ष रवीन्द्रराज ताम्रकारं कनादिल ।

अथे हे उपसमितिया संयोजक मनोज ताम्रकारं विधि व्यवहारया नामय् अनावश्यक रुपं खर्च यायेगु प्रवृत्ति अप्वया वनाच्वंगु धासें उकियात नियन्त्रण यायेगु ल्याखं हे समाजं उकथं मंकाःकथंया संस्कार याना वयाच्वनागु खः धयादिल ।

मंकाः इहि व कय्तापुजा ज्याझ्वलय् सहभागि मस्तय् अभिभावकपिंसं नं थुकथंया ज्याझ्वलं थःपिं लाभान्वित जूगु धासें समाजया ज्यायात कयाः च्वछायादिल । ताम्रकार नापं गैर ताम्रकारतय् नं सहभागिता थुगु थुकथंया ज्याझ्वः झिंस्वक्वःखुसी जूगु खः ।