ख्वपय् सांस्कृतिक सम्पदा पदयात्रा क्वचाल
ख्वप(नेपालभाषा टाइम्स)/ ख्वप नगरपालिकाया ग्वसालय् जूगु सांस्कृतिक सम्पदा पदयात्रा क्वचाल । वंगु आइतवाः ख्वप नगरपालिका ९ वडास्थित सुर्यमधि त्वालं न्ह्याःगु सांस्कृतिक सम्पदा पदयात्राया झ्वलय् ख्वप नगर दुनेया झिंखुगू पुखूया परिक्रमा याःगु खः ।
‘ख्वपया पुखू म्हसीके, सम्पदा संरक्षणय् न्ह्यःने न्ह्यज्याये’ धइगु नारा बियाः न्ह्याःगु सम्पदा पदयात्राया उलेज्या ख्वप नगरपालिकाया प्रमुख, उपप्रमुखलिसें विशिष्ट व्यक्तित्वपिंसं शान्तिया प्रतीक बखुं ब्वयेकाः यानादीगु खः । सांस्कृतिक सम्पदा पदयात्राया मू उद्देश्य ख्वप देय् दुने थीथी थासय् च्वंगु सम्पदाया म्हसीका बीगु व अज्याःगु सम्पदा संरक्षणय् उत्साहित यायेगु जूगु नगरपालिकां न्ह्यथंगु दु ।
ख्वप देय् चाःहिलेत वइपिं आन्तरिक व बाह्य पर्यटकयात सांस्कृतिक व ऐतिहासिक नगर दुनेया थीथी थासय् न्यना वनाच्वंगु सम्पदाया विस्तृत रुपं जानकारी, म्हसीका बीगु नापं उकिया संरक्षण, संवद्र्धन यायेगु उद्देश्यं नगरया दक्षिण भेगय् च्वंगु झिंखुगू पुखूया परिक्रमा याःगु खः । थुपिं दक्वं पुखूया परिक्रमा लिपा सम्पदा यात्रा १ वडाया दूधपाटीस्थित भाजु पुखूलिइ थ्यंकाः क्वचायेकूगु खः । समापन ज्याझ्वलय् मूपाहांकथं नेपाल मजदुर किसान पार्टीया सचिवलिसें संघीय सांसद प्रेम सुवाल झायादीगु खः । ज्याझ्वलय् नवासें वय्कलं ख्वप देय्या कला संस्कृति विश्वय् च्वन्ह्याः धासें स्वास्थ्य व पर्यावरणीय दृष्टिकोणं पुखूया महत्व अद्वितीय खः धयादिल ।
ऐतिहासिक, धार्मिक, सांस्कृतिक सम्पदा मानव सभ्यताया प्रतीक खः धासें थुकिया संरक्षण, संवद्र्धनं मानव इतिहासयात जीवन्त याना तयेत ग्वाहालि याइ धयादिल । नेपाःया जक मखसे विश्वया हे सम्पदाया रुपय् विश्व सम्पदाया धलखय् दुथ्यानाच्वंगु सम्पदातय् संरक्षण, संवद्र्धन याना वनेमाः धासें वय्कलं ख्वपया निगू सम्पदा विश्व सम्पदाया धलखय् दुथ्यानाच्वंगु व विश्व सम्पदा संसारया हे सभ्यताया रुपय् दुगुलिं थुकिया संरक्षण यानाः न्ह्याः वनेमाःगु खँय् नं बः बियादिल ।
बागमति प्रदेशसभाया दुजः सुरेन्द्रराज गोसाइं खँचा पुखूया विशेष महत्वया पुखू जूगु धासें थुगु पुखूया अध्ययन अनुसन्धान यायेमाःगु खँय् बः बियादिल । लिसें वय्कलं ख्वप नगरपालिकाया ग्वसालय् जूगु सांस्कृतिक सम्पदा पदयात्रा मात्र सम्पदाया अवलोकन यायेगु मखसे अध्ययन यायेगु नं अवसर खः धयादिल ।
ज्याझ्वःया सभापतिलिसें ख्वप नगर प्रमुख सुनिल प्रजापतिं ख्वप देय् दुने ४० गू पुखू दुगु व उकीमध्ये ३४ गू पुखू अझं अस्तित्वय् दुगु जानकारी बियादिल । लिसें वातावरण व पर्यावरणया ल्याखं महत्वपूर्ण पुखू सम्पदाया अध्ययन, अनुसन्धान व पुनःनिर्माण थेंज्याःगु ज्या नं नगरपालिकां याना वयाच्वनागु जानकारी बियादिल । छगू सम्पदा अन्त्य जुइगु धयगु छगू इतिहासया नं अन्त्य जुइगु खः धासे सम्पदाया महत्व म्हो जुइगु ज्या सुंपाखें नं मजुइमा धकाः नगरपालिका सचेत जुयाः न्ह्यचिला च्वनागु वय्कःया धापू दु ।
ज्याझ्वलय् ख्वप नगर उपप्रमुख रजनी जोशी, नेपाल पर्यटन बोर्डया रोहिणी खनाल, कला परिषद्या आयुषा श्रेष्ठं लगायतं ख्वपया मूर्त अमूर्त सम्पदाया थीथी पक्षयात कयाः कुलादीगु खः ।
सम्पदा पदयात्रा उलेज्याझ्वलय् ५ वडा अध्यक्ष योगेन्द्रमान बिजुक्छेँ व समापन ज्याझ्वलय् ९ वडाअध्यक्ष रवीन्द्र ज्याख्वं ज्याझ्वः उद्देश्ययात कयाः नुगःखँ तयादीगु खः ।
सूर्यमधि त्वाःया कुम्ह त्वालं शुरु जूगु सम्पदा पदयात्रा जेँला पुखू, खँचा पुखू, याता (न्हुदँ) पुखू, गोल्मधि पुखू, कुमारी पुखू, खँला (ख्यः) पुखू, लैको पुखू, तलेजु देगः परिसरय् च्वंगु लुँहिति पुखू, ख्वपया तलेजु परिसर दुने मू चुकया उत्तर पश्चिम कुनय् च्वंगु दुमाजु पुखू ख्वप लाय्कूया मध्य क्षेत्रय् भन्दाः (भण्डार) पुखू, नासमना पुखू (मंगलकुण्ड), मंगलाछेँ पुखू, देगमना पुखू, तेखा पुखू जुयाः दुधपाटीस्थित भाजु पुखुलिइ थ्यंकाः क्वचायेकूगु खः ।
LEAVE YOUR COMMENTS