नेपालभाषा ब्वंकेत स्कूलतय्त पौ
येँ मनपां १ निसें ८ तगिं तक नेपालभाषा ब्वंकेत इनाप यात
येँ (नेपालभाषा टाइम्स) – येँ महानगरपालिकां महानगर दुनेया फुक्क हे स्कूलय् नेपालभाषां तयार याना तःगु स्थानीय पाठ्यक्रम ब्वंकेगु लागिं इनाप याःगु दु। मनपाया शिक्षा विभागपाखें म्हिगः फुक्कं विद्यालयतय्त पौ छ्वसें थ्व निर्देशन बिउगु खः ।
शैक्षिक वर्ष २०७७ निसें आधारभूत तह (कक्षा १ निसें ८ तक) नेपालभाषाया माध्यमं स्थानीय पाठ्यक्रम ब्वंकेगु धकाः जूगु निर्णय कथं थ्व इनाप यानागु खँ पती धयातःगु दु। शिक्षा विभागया शिक्षा अधिकृत मोतिराज खनालपाखें हस्ताक्षर यासें उगु निर्देशन जारी याःगु खः । येँ महानगरपालिकाया वंगु २०७७-०६-१९ कुन्हु च्वंगु ५१ क्वःगु बैठकं येँ महानगरपालिका अन्तर्गत सञ्चालित फुक्कं स्कूलय् शैक्षिक सत्र २०७७ निसें आधारभूत तहलय् नेपालभाषाया स्थानीय पाठ्यक्रम ब्वंकेगु निर्णय याःगु खँ नं पती न्ह्यथनातःगु दु ।
नेपाःया न्हूगु संविधानय् हरेक स्थानीय तहयात थः मातहत लाःगु फुक्कं स्कूलय् थम्हं हे पाठ्यक्रम लागू यानाः ब्वंके फइगु अधिकार बियातःगु दु । स्थानीय थाय्या म्हसीका बीगु उगु पाठ्यक्रम स्थानीय भासं हे जुइमाःगु खँ कानूनय् उल्लेख जुयाच्वंगु दु । संविधान व कानूनया उगु व्यवस्थाया आधार कासें येँ महानगरपालिकां स्थानीय पाठ्यक्रम नेपालभाषां ब्वंकेगु धकाः निर्णय याःगु खः । वंगु असारं क्वचाःगु नगरसभाया न्हय्क्वःगु अधिवेशनं थ्व निर्णय याःगु खः ।
येँ महानगरपालिकापाखें नेपालभाषां ब्वंकेगु लागिं ‘येँ देय् म्हसीके’ नांया पाठ्य सफू तयार यायेधुंकूगु दु । १ निसें ८ तगिं तक उगु पाठ्यसफू ब्वंकेगु व्यवस्था दु। सफुली येँ देय् या कला, संस्कृति, सम्पदा, थाय्बाय्, रहनसहन, व्यक्तित्व आदि सम्बन्धी पाठ दुथ्याकातःगु दु । पाठ्यसफू नेपालभाषां तयार यानातःगु खःसां उकी अभ्यासगत खँत यक्व दुथ्याःगु जुयाः गैरनेवाः विद्यार्थीतय्सं नं याउँक सयेके फइगु खँ पाठ्यक्रम निर्माण समितिया दुजः डा. चुन्दा वज्राचार्यं कनादीगु दु ।
येँ मनपां म्हिगःनिसें १ तगिमय् उगु पाठ्यसफूया आधारय् रेडियो कक्षा कायेगु शुरु यायेधुंकूगु दु । उगु विषय ब्वंकेगु लागिं येँ मनपां शिक्षक दरबन्दीया नं व्यवस्था याःगु दुसा उकी सहभागी जुइपिं शिक्षकतय्त विशेष तालिम बियाः तयार यायेगु खँ स्यनेकने दबूया नायः वरुणप्रसाद वैद्यं कनादीगु दु ।
LEAVE YOUR COMMENTS