नेवाः व नेपालभाषा धायेत तथ्यांक विभागय् ज्ञापनपत्र

येँ- देशय् जुयाच्वंगु राष्ट्रिय जनगणनाय् जातजातिया व भाषाया सवालय् नेवाःतय्त जातजातिइ ‘नेवाः’ व भाषाय् ‘नेपालभाषा’ तयेमाःगु माग यासें तथ्यांक विभागय् छगू ज्ञापनपत्र लःल्हाःगु दु ।

नेवाः देय् दबूया नेतृत्वय् बिहिवाः तथ्यांक विभाग वंगु छगू पुचलं विभागया महानिर्देशक नेविनलाल श्रेष्ठयात ज्ञापनपत्र लःल्हाःगु खः । ज्ञापनपत्रय् जनगणनाया प्रश्नावलीया ६ नं. कोडय् जातिया नामं ‘नेवार’ तयातःगुयात ‘नेवाः’ यायेमाःगु, भाषाया नामय् ‘नेवारी’ तयातःथाय् ‘नेपालभाषा’ तयेमाःगु माग न्ह्यथनातःगु दु । अथेहे जनगणनाया इलय् भाषाया सवालय् ‘नेवाः’, ‘नेवार’, ‘नेवारी’ वा ‘नेपालभाषा’ न्ह्यागु धकाः लिसः वःसां उकियात कोड नं. ६ अन्तर्गततय्त गणक, सुपरिवेक्षक व जनगणनाय् संलग्न जुइपिं सकसितं पत्रचार यानाः जानकारी बीत व जनगणनाया प्रतिवेदन पित बीबलय् जातिइ ‘नेवाः’ व भाषाय् ‘नेपालभाषा’ धकाः दुथ्याकाः प्रकाशन यायेमाःगु माग न्ह्यब्वःगु खः ।

ज्ञापनपत्र लःल्हाना कयादिसें विभागया महानिर्देशक श्रेष्ठं नेवाः समुदायया मागकथं ज्या जुइगु बचं बियादीगु खः । तर आः प्रश्नावली हे छापे जुइधुंकूगुलिं धाःसा प्रश्नावली दुथ्यानाच्वंगु नेवार व नेवारी भाषायात धाःसा चिइकेमफइगु खँ नं वय्कलं धयादीगु दु । वय्कलं गणकतय्त प्रशिक्षण बीगु ज्या ल्यंदनिगुलिं प्रशिक्षण बीबलय् हे गणकतय्त २ नं. बुँदाया माग कथं नेवाः, नेवार, नेवारी वा नेपालभाषा न्ह्यागु लिसः बिउसां कोड नं. ६ लय् दुथ्याकेत धायेगु व ३ नं. बुँदाया माग कथं प्रतिवेदन पिकायेबलय् नं नेवाः व नेपालभाषा धकाः धाःसा दुथ्याकेगु खँ धयादीगु खः ।

निर्देशक श्रेष्ठं नेपालभाषा धकाः धायेबलय् गणकतय्त नेपालीभाषा व नेपालभाषाय् झन अलमल खनेदइगु जूगुलिं प्रश्नावलीइ नेवारी दुथ्यानाच्वंगुलिं गणकत भ्रमित मजुइगु बिचाः नं प्वंकादीगु खः । थ्व झ्वलय् वय्कलं स्वनिगलय् तथ्यांक संकलन याये तसकं थाकुगु खँ न्ह्यथँसें स्वनिगःया वासिन्दातय्त झर्को मचासे तथ्यांक बिइत नं इनाप यानादीगु दु ।

तथ्यांक विभागय् ज्ञापनपत्र बिइगु निंतिं नेवाः देय् दबू केन्द्रीय समितिया पदाधिकारीपिं लिसें येँ, यल, ख्वप जिल्ला कचाया पदाधिकारी, नेपालभाषा मंकाः खलःया पदाधिकारीपिं लिसें नेपालभाषा ख्यःया कार्यकर्तापिं विभागय् थ्यंगु खः ।

थ्वहे झ्वलय् नेवाः देय् दबू व नेपाल तामाङ घेदुङं जनगणनाया इलय् निगूगु भाय्या न्ह्यसलय् नेवाःतय्सं तामाङ धायेगु व तामाङतय्सं नेवाः भाय् धायेगु निंतिं इनाप यासें छगू वक्तव्य पिथँगु दु । नेवाः समुदाय व तामाङ समुदाय दथुइ निगूगु भाय्या थासय् नेवाःतय्सं तामाङ व तामाङतय्सं नेवाः धायेगु सहमति जुयाच्वंगु दु ।