हलिं नेवाः न्ह्यसः लिसः कासा क्वचाल

येँ- नेवाः अर्गनाइजेसन (डब्लुएनओ)या ग्वसालय् न्ह्यानाच्वंगु न्हापांगु हलिं नेवाः न्ह्यसः लिसः कासा –११४१ क्वचाःगु दु । शनिवाः थनया जगतसुन्दर ब्वनेकुथिइ जूगु बिजं कासालिसें प्यला न्ह्यवंनिसें न्ह्यानाच्वंगु कासा क्वचाःगु खः ।

बिजं कासाय् यलबुकः स्वां न्हाप लाःगु दु । प्यंगू पुचःया दथुइ जूगु कासाय् गुलाफ स्वां पुचः लिउ, सिन्हः स्वां पुचः लियांलिउ व अजूस्वां पुचलं हःपाः सिरपाः त्याकेत ताःलाःगु दु । कासाय् न्हाप लाःगु यलबुकःस्वां पुच ११५ ल्याः हयाः न्हाप लाःगु खःसा गुलाफ स्वां पुचः ११५, सिन्हः स्वां १०५ व अजू स्वां पुचलं ४५ ल्याः काःगु खः।

डब्लुएनओ छगू दशक क्यंगु लसताय् च्यागूनिसें झिगू तगिं तकया ब्वँमिपिनि दथुइ जूगु कासा वंगु गुंलाथ्व चतुर्दशिनिसें न्ह्याःगु खः । कासाय् नेपाःलिसें अमेरिका, क्यानाडा, बेलायत, आयरल्याण्ड लगायतया देशय् नीगू पुचलं ब्वति काःगु खः ।

कासाय् त्याःपिंत छसिकथं न्हापयात ६००, लिउयात ४५०, लियांलिउयात ३०० व हःपाःयात १५० अमेरिकी डलरया सिरपाः बीगु जूगु दु । अथे हे कासाय् ब्वति काःगु प्रत्येक पुचःयात १५ अमेरिकी डलर बीगु जूगु दु ।

बिजं कासाय् त्रिभुवन विश्वविद्यालयया पुलांम्ह उपकुलपति डा. कमलकृष्ण जोशी व च्वमिलिसें साहित्यकार डा. रीना तुलाधर बनियां निर्णायकया भूमिका म्हितादीगु खः ।

न्हापांगु चरणय् न्यागू कासा जूगु खःसा निगूगु चरणय् प्यंगू कासा जूगु खः । अथे हे स्वंगूगु चरणय् निगू कासा लिपा बिजं कासा जूगु खः । प्रत्येक कासाय् नेपाःलिसें नेपालं पिने च्वनाच्वंपिं साहित्यकार, च्वमि, पत्रकार, कलाकार, भाषा ह्यमिपिं निर्णायकया भूमिका म्हितादीगु खः ।

कासाय् त्याःपिं नापं ब्वति कयादीपिं सकसितं आः वइगु शनिवाः छगू विशेष ज्याझ्वःया दथुइ सिरपाः लःल्हायेगु ग्वसाः खलः डब्लुएनओ नं जानकारी बिउगु दु ।

सम्बन्धित बुखँ

LEAVE YOUR COMMENTS