मेयर शाक्यपाखें पत्रकार दबूया न्हूगु ज्यासना पुचःयात भिंतुना

येँ – येँ महानगरपालिकाया मेयर विद्यासुन्दर शाक्यं नेवाः पत्रकार राष्ट्रिय दबूया न्हू निर्वाचित केन्द्रीय ज्यासना पुचःयात भिंतुना बियादीगु दु । येँ मनपा मेयर शाक्यं पत्रकार दबूया न्हूगु ज्यासना पुचलं बांलाक ज्या याना वने फयेमा धकाः सुवाः बियादिसें कार्यकाल सफलताया नं कामना यानादिल ।

मेयर शाक्यं छगू इलय् नेपालभाषाया न्हिपौ विश्वभूमि व खय् भाय्या बुधवाः वाः पौया निंतिं थम्हं नं पत्रकारिता यानागु खँ कनादिसें पत्रकारिता व संचारमाध्यमया थौंया अवस्था व समस्या बारे थः नं जानकार दुगु खँ धयादिल ।

नेपालभाषाया संचार ख्यःया विकासया निंतिं येँ मनपापाखें थम्हं फक्व ग्वाहालि यायेगु प्रतिवद्धता प्वंकादिसे वय्कलं भाय् नं संस्कृतिया हे छगू ब्व जूगु धासें भाय्या विकास मजुइकं स्थानीय संस्कृतिया विकास नं याये फइमखु धयादिल । लिसें वय्कलं स्थानीय भाषा, संस्कृतिया संरक्षणया निंतिं स्थानीय मातृभाषाया संचारया नं विकास जुइमाःगु खँय् बः बियादिल ।

भाषा व संस्कृतिइ वयाच्वंगु विचलन, विकृति व विसंगति पनेत नेवाः पत्रकारत हे न्ह्यचिलेमाःगु खँय् बः बियादिसें वय्कलं नेवाः भाय् व स्थानीय संस्कृतिया विकासया निंतिं सकल नेवाः पत्रकारतय्सं महत्वपूर्ण भूमिका म्हितेमाःगु थौंया आवश्यकता जूगु धयादिल ।

नेवाः राष्ट्रिय पत्रकार दबूया न्हू निर्वाचित नायः सुरजवीर वज्राचार्यं देय्न्यंकं क्रियाशील नेवाः पत्रकारतय् तथ्यांक संकलन यायेगु ज्या दबूपाखें यायेमाःगु आवश्यक जूगु खँ कुलादिसें नेवाः पत्रकारतय् क्षमता अभिवृद्धिया निंतिं नं दबुलिं पहल यायेगु जुइ धयादिल । लिसें आः पत्रकार दबूयात योजनावद्ध धंगं न्ह्याकेगु योजना दुगु नं वय्कलं धयादिल ।

दबूया न्वकु नृपेन्द्रलाल श्रेष्ठं दबूया भावी संगठनात्मक स्वरुप, संरचना, संगठन विस्तारया बारे खँ कनादिसें थ्व स्वयां न्ह्यःया कार्यकालय् दबुलिं नेपाल आदिवासी जनजाति पत्रकार महासंघ (फोनिज)लिसेया सहकार्यय् न्हापांखुसी मातृभाषा पत्रकारिता दिवस हनागु खँ कनादिल ।

उगु इलय् पत्रकार दबुलिं मातृभाषाया न्हापांम्ह पत्रकार धर्मादित्य धर्माचार्यया जीवनी पाठ््यक्रमय् दुथ्याकेगु व वय्कःया झ्वाता पलिस्था यायेत नं इनाप याःगु खः ।उगु इलय् येँ मनपाया प्रवक्तालिसें १५ वडाअध्यक्ष ईश्वरमान डंगोल, २३ वडाअध्यक्ष मचाराजा महर्जन, दबूया सल्लाहकार सुरेश किरण मानन्धर, विजयरत्न असंबरेया नं उपस्थिति दुगु खः ।