नेकपाया विवाद : परालको आगो

खय् भासं उखान छगू दु, ‘लोग्ने स्वास्नीको झगडा, परालको आगो’ । थौं सत्तारुढ नेपाल कम्युनिष्ट पार्टी (नेकपा) दुने नं थःगु हे पार्टीया नेतातय् दथुइ कलाःभाःत ल्वापु थें निग्ति निग्ति खँय् ल्वापु जुयाच्वंगु दु। गबलें पार्टी तछ्याइन धकाः ल्वापु, गबलें पार्टी थः यथे चले याये मखनीगु खँय् ल्वापु व गबलें थःत मन्त्री पदं चिइकूगु खँय् ल्वापु। थः पदय् च्वंतले पार्टी विरोधी, जनविरोधी व राष्ट्रविरोधी न्ह्यागु ज्या याःसां पाय्छि । जब थःगु मन्त्री पद मदइ अबलय् थःगु हे पार्टीया सरकार विरुद्ध जथानाम न्ववायेगु वँय्सू नं दु झी नेतातय्के । थज्याःगु थीथी कारणं यानाः वंगु वालय्ने कपाया नेता सुरेन्द्र पाण्डे चितवनया छगू सार्वजनिक ज्याझ्वलं ज्यान बचे यानाः बिसिउँ वयेमाःगु अवस्था ब्वलन । पृथ्वीनारायण शाहयात किपूया जनतां लितुमतु लिनाः ज्वनाः स्यायेत्यंगु अवस्थाया लु खने दुगु फेसबुकय् भाइरल जूगु भिडियों नेकपा दुने गुलितक अनमेल ब्वलन धइगु स्पष्ट क्यं ।

नेकपा गठनकालनिसें थीथी कथंया अनमेल दुथ्यानाः ब्वलंगु पार्टी खः । देसय् बहुदलीय प्रजातन्त्र पुनःबहाली जुइ धुंकाः चुनाव त्याकेगु नियतं जक मार्क्सवादी व मार्क्सवादी-लेनिनवादी पार्टी मिले जुयाः नेकपा एमाले गठन जूगु खः । अबलय्निसें निगू पार्टीया भू हे बांलाक हुयावंगु मदुनि । छखे पार्टी दुनेया छुं पद, लाभ वा सुविधाया खँ वइगु इलय् थ्व छु धारं वःम्ह वाय् मार्क्सवादीं वःम्ह खः वा माक्र्सवादी लेनिनवादी धारं वःम्ह खः धइगु स्वयेगु चलन दु। न्हापांखुसी २०५१ सालय् थःपिं सरकारय् वंगु इलय् तकं मार्क्सवादीं वःम्ह मनमोहन अधिकारीयात प्रधानमन्त्री यानाः माधव नेपाल थेंज्याःम्ह मार्क्सवादी लेनिनवादीं वःम्हेसित गृहमन्त्री यात । थौं अथेहे केपी ओली पक्ष, झलनाथ पक्ष, माधव नेपाल पक्ष व अझ स्पष्ट खने दयेक मवःसां वामदेव गौतमया पक्ष धकाः अलग अलग मन्त्रीतय् भागय् सत्ता भागबन्डा यायेगु परिपाति चले जुयाच्वंगु दु। छगू पक्षयात खत्तम यायेगु ल्याखं केपी शर्मा ओलीं मन्त्रीमण्डल पुनःगठन यानाः न्हून्हूपिं मन्त्री हयेवं नेकपा दुने घोर असन्तोष ब्वलंगु दु । उकिया लिच्वःकथं थौं पार्टी दुनेया नेतातय्त सांघातिक हमला यायेगु तकं सुरु जूगु दु। थ्व क्रम आः थ्व स्वयां नं अझ तच्वया वनीगु खँय् निगू मत दइमखु ।  थौं माधव नेपाल पक्षया नेतायात कडा कारवाही यायेगु स्वत, कन्हय् केपी ओली पक्षया नेता गनं वनधाःसा वयात बहिष्कार यायेगु ज्याझ्वः तयार जुइ । कंस झलनाथ व वामदेव गौतमया पाः वयेफु। थथे जुइगु इलय् नेकपा थवंथः चकनाचूर जुयाः फुइगु स्वयां मेगु छुं जुइमखु। अले गबले माओवादीपाखें वःपिं प्रचण्ड, बादल, झक्कू व नारायणकाजी श्रेष्ठपिं नापं टक्करय् च्वनेगु ई वइगु खः ? नेपाली कांग्रेसयात थुकिं हे हाइसन्चो
जुइगु जुल ।

थौं माधव नेपाल पक्षया नेतायात कडा कारवाही यायेगु स्वत, कन्हय् केपी ओली पक्षया नेता गनं वनधाःसा वयात बहिष्कार यायेगु ज्याझ्वः तयार जुइ । कंस झलनाथ व वामदेव गौतमया पाः वयेफु। थथे जुइगु इलय् नेकपा थवंथः चकनाचूर जुयाः फुइगु स्वयां मेगु छुं जुइमखु ।

सरकारं याःगु घोर कमजोरीयात सुचुकेगु कासाकथं हे नेकपा दुने तच्वःगु विवाद क्यंगु जुइमाः । मखुत धाःसा केपी ओली व प्रचण्डया दथुइ थुलि तच्वःगु विवाद सिर्जना जुयाः वामदेव गौतमयात प्रधानमन्त्री यायेगु कासा अन लाः गन लाः मदयाच्वंगु थ्व इलय् माधव नेपाल पक्षया छम्ह नेतायात आक्रमण यायेमाःगु अवस्था छाय् वल । धायेत ला पार्टीया नेतां सार्वजनिक ज्याझ्वलय् न्ववागु खँयात कयाः जूगु आक्रमणय् सहभागी सुं कार्यकर्तायात बाकी मतःसें कारवाही यायेगु जुइ धकाः केन्द्रीय बैठकं निर्णय याये धुंकूगु दु। तर थुकिं पार्टीयात गन थ्यंकी धइगु खँ नं तप्यंक अनुमान यायेफुगु खँ खः । थ्व न्हापांखुसी जूगु आक्रमण, प्रत्याक्रमण व उपद्रोया घटना धाःसा मखु। इमि दुने तःक्वःमछिं थीथीकथं दुने व पिने खने दयेक व खने मदयेक आक्रमण प्रत्याक्रमण जुयाच्वं । पार्टीया महाधिवेशन जुइगु इलय् माधव नेपाल व केपी ओलीया पक्षय् प्रचार जुइगु इलय् निगू अलग धुर्वया पार्टी दुनेया कार्यकर्तातय् दथुइ जुइगु प्रचार थें च्वं ।

थथे नेकपा दुने खने दुगु थ्व विवादं थौं नेपाली जनतायात अन्यौलय् लाकातःगु दु। देसय् विकास निर्माण, शिक्षा व स्वास्थ्यया बांलाःगु व्यवस्था नापं अन्तर्राष्ट्रिय हस्तक्षेपपाखें बचे जुइगु थेंज्याःगु राष्ट्रिय मामलातकं थौं ध्याकुनय् लाःवनाच्वंगु दु। उकिया मू कारण धइगु थः शासक दल जुयाः नं इमिसं शासन पद्धतियात क्वातुक चले यायेत मस्वःगुलिं खः । बेमानतय् जक पक्ष लिनाः सरकारय् वंपिं दलतय्सं ज्या यानाच्वंगु कारणं थौं देस रसातलय् दुबिनाच्वंगु दु। उद्धार यायेत वःपिं न्हूगु दल नं नां जकया प्रतिपक्षी जुयाः सत्ताया सवाः कायेगुलिइ जक तक्यनाच्वंगु दु। सारा जनतां चाहे जूसां थन बजाः भाः दंकेगु, इलय् कृषकतय्त साः हया बीगु थेंज्याःगु थीथी खँयात ध्याकुनय् लाकातःगु दु । सारा जनतायात नयेगु, त्वनेगु व पुनेगु व्यवस्था यायेगु खँय् ध्यान हे मतःसें वा नयेगु नसा उत्पादन याइपिं कृषकतय्गु मागयात बेवास्ता यानाः थन जनतायात सरकारं दुःख बियाच्वंगु दु। थज्याःगु शासन पद्धतियात वांछ्वयाः सरकारय् वंपिं नेतातय्सं बांलाक ज्या याये मफुगु अवस्थाय् इमित गुनासो याइगु, मजिउ धाइगु व फयांफछि चीका छ्वइगु स्वाभाविक नं खः । तर शासन पद्धति दुने चले जुइगु थुगु निरन्तर ज्यायात त्वह दयेकाः सरकारया आलोचनाया नामय्वि रोध यानाः सरकारयात हे क्वथलाः अराजक स्थिति ब्वलंकेत स्वत धाःसा उकिं पार्टीयात ला नोक्सान जुइगु हे खत, नेपाली जनतां नं सुख सीमखु ।

नेकपा अथें हे ल्वाकःबाकः पार्टी जुइधुंकूगुलिं थुकिं स्पष्ट सोच, धारणा व सैद्धान्तिक अवधारणा पित हइगु अपेक्षा यायेगु हे बेकार खः । थौं मखुसां कन्हय् कम्युनिष्ट फुक्कं छथाय् वइ हे तिनि । तर कम्युनिष्टया नां हे बदनाम जुइकथं गूट उपगूटया नेता जुयाः पार्टी नेतृत्व यायेगु ज्याय् सदां थःपिंत पाना जुइपिं नेतातय् कारणं झीगु देसय् जनतां गबलें सुख, शान्ति व अमनचयन चूलाके फुगु अवस्था मदु । नेपालय् कम्युनिष्टया नामं पूँजीवादी शासन पद्धति चले जुयाच्वंगु कारणं हे तुलनात्मक रुपं प्रगतिशील विचारधारां ज्या याये मफयाच्वंगु खः । नां जक गणतन्त्र, समाजवादउन्मुख संविधान दुगु देय् जुयाः वास्तविकताय् पूँजीवादय् चुर्लुम्म दुबे जुयाच्वंगु देय् जूगुलिं थौं गनं हे न्हूगु पद्धति व न्हूगु अवधारणां थाय् काये मफयाच्वंगु दु ।

सम्बन्धित बुखँ

LEAVE YOUR COMMENTS