किपुली शिवदेवया शालिक तयेत माग
पृथ्वीनारायणया सालिक तलधाःसा सामाजिक सद्भाव स्यनेफु
येँ – नेवाः प्रदेशय् आदिवासी जनजाति जागरण अभियानं किपूया भत्क्यापाटी लागाय् पृथ्वीनारायण शाहया मखु शिवदेव तृतियया शालिक तयेत माग याःगु दु । म्हिगः बुधवाः किपू नगरपालिकाय् ज्ञापनपौ बिसें उगु माग याःगु खः । छुं दिं न्ह्यः जक किपूया भत्क्यापाटीया छुं छगू पुचःपाखें पृथ्वीनारायण शाहया शालिक तयेत सिफारिसया नितिं निवेदन दर्ता याःगु खः ।
उगु इलय् उपमेयर सरस्वती खड्कां टोक लगे यानाः पृथ्वीनारायण शाहया शालिक तयेगु नितिं निवेदन दर्ता जुल धकाः छथ्वः सिनं प्रचार प्रसार यानाच्वंगु नापं समाजिक सञ्जाल फेसबुकय् तकं ब्यापक रुपं चर्चा यानाच्वंगु खः । उकियात लिसः बीकथं नेवाः प्रदेशय् आदिवासी जनजाति जागरण अभियानपाखें सरोकार क्यनाः बुधवाः नगरपालिकाय् ज्ञापनपौ बीगु ज्या याःगु खः ।
उपमेयरयात लः ल्हाःगु पतिइ किपुलिइ स्वक्वः तक पृथ्वीनारायण शाह नं आक्रमण याःगु खँ न्ह्यथँसें दकलय् लिपा एकपक्षीय रुपं पृथ्वीनारायण शाहया फौजं युद्ध हे मयासे त्यात धकाः घोषणा यायेधुंकाः प्रतिशोधया भावना किपूमितय् न्हाय् म्हुतु व न्हाय्पं तकं ध्याना बिउगु खँ न्ह्यथना तःगु दु ।
ज्ञापनपतिइ किपूमितय्सं राजतन्त्रयात गबलें नं स्वीकार मयाःगु अले आः संघीय गणतन्त्र वये धुंकाः नं पृथ्वीनारायण शाहया शालिक किपू नगरय् तल धाःसा उकिं जातीय नापं सामाजिक सद्भाव स्यनिगु सम्भावना दु धासें यदि उथकं सामाजिक सद्भाव स्यनधाःा उकिया जिम्मेवारी सरोकारवालां हे कायेमाली धकाः ख्याच्वः नं बियातःगु दु ।
अथेहे ज्ञापनपतिइ किपूया निर्माता शिवदेव तृतिया शालिक तयेगु आधार दुगुलिं बरु भत्क्यापार्टी शिवदेवया शालिक तयेमाःगु माग नं यानातःगु दु । ज्ञापनपौ लःल्हाना कासें उपमेयर सरस्वती खड्कां थःम्हं पृथ्वीनारायण शाहया शालिक तये मजिउ धकाः धयागु खँयात एकपक्षीय रुपं प्रचार याःगुलिं थः नं अजू चायाच्वनागु खँ कनादिल ।
लिसें वय्कलं थः न्हापांनिसें कम्युनिष्ट जूगुलिं गुगु नं हालयत् सार्वजनिक थासय् किपू नगर दुने पृथ्वीनारायण शाहया शालिक तयेके मबिइगु बचं नं ज्ञापनपौं लःल्हागु वंगु पुचः यात बियादिल ।
नेवाः प्रदेशय् आदिवासी जनजाति जागरण अभियानया कजि अर्जुन महर्जनं नेतृत्वय् वंगु पुचलं लःल्हायेगु झ्वलय् आदिवासी जनजाति अभियन्तापिं नजरराम महर्जन, श्रीकृष्ण महर्जन, धर्म महर्जन, विनोद महर्जन, कृष्णहरी महर्जन लागयतयापिं सहभागी जुयाः थःथःगु खँतसें उपमेयर खड्कालिसे सहलह ब्याकेगु ज्या नं जूगु खः ।
वय्कःपिंसं किपूमितय्गु भावनाया अःखः ज्या जुल धाःसा उकिं जातीय नापं सामाजिक सद्भाव स्यनेफु धकाः ख्याच्वः बियादीगु खः ।
LEAVE YOUR COMMENTS