शैलेश बरेजुया ‘भिंतुना म्ये’ पिदन

येँ – नेपालसम्वत ११४१ न्हूदँया लसताय् संस्कृति सम्पदाया संरक्षक शैलेश बरेजुया ‘भिंतुना म्ये’ व ‘छ जिमि हेरा रे छ जिमि पुता रे’ म्युजिक भिडियो शनिवाः सेभ नेवाः भ्यालीया ग्वसालय् येँ पिब्वज्या जूगु दु । ज्याझ्वलय् भिंतुना म्ये पूर्व रक्षामन्त्री भिमसेन दास प्रधानं व अबु काय्या मतिना म्ये ‘छ जिमि हेरा रे छ जिमि पुता रे’ येँ महानगरप्रमुख मेयर बिद्या सुन्दर शाक्यं विद्युतिय माध्यमं पिब्वज्या यानादीगु खः । उगु म्येया संकिपा रामकृष्ण खड्गीया निर्देशनय् दयेकूगु खःसा गोविन्द ह्यूमतं लय् चिनादीगु खः ।

चारुमति विहारया महास्थवीर तपस्वी धम्मस्थवीरं मंगलसूत्र पाठ यासें म्ये हालामि पवित्र कसाःनं ज्याझ्वः न्ह्याकूगु खः । नुगः खँ तयेगु झ्वलय् मेयर शाक्यं सडकं ब्वलंगु सःयात सम्बोधन याना फयांफच्छि थःगु कार्यकालय् पूवंकेगु बचं बियादिल । शैलेश बरेजुं लसकुस व सुभाय् बियादीगु ज्याझ्वलय् म्ये च्वमि, म्ये हालामि, डाइरेक्टर, अरेन्जर, कलाकारपिं नापं मामाःगु कथं ग्वाहालि यानादीपिन्त खादां न्ययेका हनेगु ज्यानं जूगु दु । म्ये, व म्युजिक भिडियो दुने चाःमचाःखँयात कयाः लोककवि राजभाई जकःमिं समीक्षा यानादीगु खः ।