वरिष्ठ म्येँ हालामि स्वयम्भूराज शाक्य मंत

यल- नेपालभाषाया अतिकं नांजाम्ह म्येँ हालामि स्वयम्भूराज शाक्य मंगलवाः बहनि मंत । वय्कः ६४ दँया उमेरय् मदुगु खः ।
कोरोना संक्रमण खनेदयेवं उपचारया निंतिं विपि स्मृति अस्पतालय् भर्ना जुयादीम्ह वय्कःया लिपांगु इलय् याःगु पीसीआर परीक्षण नेगेटिभ वःगु वय्कःया छेँजःपिंसं जानकारी बिउगु दु ।

मदुम्ह शाक्ययात नेपालभाषा संगीतिक ख्यलय् न्हूगु शैली व सृजनाया प्रयोग याइम्ह साधककथं कायेगु याः ।

छुं ई न्ह्यः जक वय्कःया थःगु हे त्वालय् याकः सांगीतिक सनिल ज्याझ्वः जूगु खः । उगु ज्याझ्वःया सफलता लिपा वय्कः हाकनं उकथं हे मेगु सांगीतिक ज्याझ्वः न्ह्यब्वयेगु तयारी यानाच्वनादीम्ह खः ।

न्हापा म्येँ रिकर्डिंग यायेगु उलि सहज व सुलभ मजूगु इलय् नं थःगु गायकीयात च्वन्ह्याकेत क्वथाय् हे उपलब्ध सांगीतिक हलज्वलं, प्रविधि व प्राविधिकलिसें स्वंगू दशक न्ह्यव वय्कलं नेपालभाषाया मतिना नांया म्येँचाः रेकर्ड यानाः पिथनादीगु खः ।

सांस्कृतिक संस्थानं सेवा निवृत्त जुयादीम्ह वरिष्ठ म्येँ हालामि शाक्य रेडियो नेपालया नं विशिष्ट श्रेणीया म्येँ हालामि खःसा वय्कः आपालं सिरपाः व सम्मानपाखें सम्मानित नं जुयादीधुंकूगु दु ।

वय्कलं श्रीलंका, तिब्बत, बंगलादेश, हंगकंग, साउदी अरब, जापान, बैंकक लगायत आपालं देशय् थःगु सांगीतिक प्रस्तुति नं बियादीधुंकूगु दु ।
नेपालभाषा, खय् भाय्या आधुनिक, भजन, संकिपाय् यानाः निसःत्या स्वयां अप्वः म्येँय् सः बियादीधुंकूम्ह वय्कःया न्यागू गीति संग्रह नं पिहां वयेधुंकूगु दु । वय्कःया प्यंगू एकल सांगीतिक ज्याझ्वः नं जुइधुंकूगु दु । वय्कलं खय् भाय्या संकिपाय् नं संगीत बियादीगु दु ।

वय्कः हःखा टोल सुधार संघया सल्लाहकार, कलाकार परिषद्या नायः लिसें आपालं संघसंस्थाय् आवद्ध जुयादीगु दु ।

मदुम्ह वय्कःया जहान, काय छम्ह व म्ह्याय् निम्ह दी ।