ने. सं. ११४४ ञलागा पारू -

शंखधर पार्कय् शंखधरया झ्वाता तइगु

येँ (नेपालभाषा टाइम्स) – थुगुसी नेपाल संवत्या न्हूदँ ११४१ या लसताय् थनया शंखधर बाटिका (पुलांगु रत्नपार्क) दुने नेपाल संवत्या प्रवर्तक शंखधर साख्वाःया झ्वाता तइगु जूगु दु । येँ महानगरपालिकापाखें अन शंखधर साख्वाःया झ्वाता तयेत्यंगु खः । न्हापा रत्नपार्क नां जुयाच्वंगु उगु पार्कया नां हिलाः छुं ई न्ह्यः तिनि ‘शंखधर पार्क’ तयेगु निर्णय जूगु खःसा थुगुसी उगु पार्क दुने शंखधर साख्वाःया झ्वाता नं तयेगु तयारी जूगु खः । उकिया लागिं सम्पूर्ण व्यवस्था येँ महानगरपालिकापाखें जुइ ।

नेपाल संवत्या प्रणेता शंखधर साख्वाःया झ्वाता थौंकन्हय् देय्या ३० स्वयां अप्वः जिल्लाय् तयेगु ज्या जुइधुंकूगु दु। राष्ट्रिय विभूति शंखधर साख्वाः प्रतिष्ठानपाखें देय्या गुगुं नं थासय् शंखधर साख्वाःया झ्वाता तइगु जुल धाःसा अन तयेगु लागिं ल्वहंयागु झ्वाता छगू निःशुल्क उपलब्ध याकेगु व्यवस्था यानातःगु दु। थगुने प्रतिष्ठानया ग्वाहालि कयाः दोल्खाय् शंखधरया झ्वाता तयेगु ज्या जूगु खः ।

न्हूदँया ज्याझ्वः :
थुगुसी नेपाल संवत् ११४१ न्हूदँया लसताय् तःधंगु ज्याझ्वःत मयाःसां राष्ट्रिय न्हूदँ समारोह समितिपाखें थनया राष्ट्रिय सभागृहय् धाःसा छगू न्हूदँ ज्याझ्वः यायेत्यंगु खँ सीदुगु दु। न्हूदँया ज्याझ्वलय् प्रधानमन्त्रीयात सहभागी यायेगु लागिं व प्रमया सन्देश कायेगु लागिं न्हूदँ समारोह समितिया दुजःपिं थौं वालुवाटार वनाः प्रधानमन्त्री केपी शर्मा ओलीयात नापलाइगु ग्वसाः दु । न्हूदँया लसताय् सार्वजनिक रूपं तःधंगु सभा व भेला यायेगु ज्या मजूसां चिचीधंगु भेला व ¥यालीत धाःसा थीथी थासय् पिकायेगु तयारी जुयाच्वंगु खँ सीदुगु दु । स्वास्थ्य सम्बन्धी मापदण्ड पूरा यानाः व सामाजिक दूरी कायम यानाः जूसां अज्याःगु चीधंगु ज्याझ्वः यायेगु ग्वसाःत जुयाच्वंगु खः ।