बाइडेनयात विश्वलिसे स्वापू बांलाकेगु हाथ्या
अमेरिकाया न्हूम्ह राष्ट्रपति डेमोक्रयाटया जो बाइडन जुइगु थ्यंमथ्यं पक्का जुइधुंकूगु दु । शनिवाः बहनी तक नं बाइडनयात ह्वाइट हाउसया कुर्सीइ यंकेत खुगू इलेक्ट्रोल मतया जक आवश्यक जुयाच्वंगु खः । शायद थौं आइतवाः तकया दुने बाइडनं थःत विजय जूगु घोषणा नं यायेधुंकी जुइ ।
अमेरिकाया राष्ट्रपति जुइगु धयागु छगू कथं विश्वया नेतृत्व यायेगु थें हे खः । आःतक नं विश्वय् अमेरिकाया दबदबा उतिकं हे दयाच्वंगु दनि । तर वर्तमान राष्ट्रपति डोनाल्ड ट्रम्पं थःगु कार्यकालय् विश्वलिसेया स्वापूयात धाःसा यक्व हे स्यंकावंगु दु। बाइडन राष्ट्रपति जुल धाःसा धाथें अमेरिकायात शक्तिशाली यानातयेगु खःसा विश्वलिसेया स्वापूयात नं बांलाकेमाःगु उतिकं हे चुनौती दइ । ट्रम्प हाकनं राष्ट्रपतिइ वल धाःसा थ्व स्वापू झन स्यनावनीगु पक्का खः, तर आःकया अवस्थाय् ट्रम्प त्याइगु सम्भावना धाःसा तसकं हे म्हो जक दु। थःगु कार्यकालय् ट्रम्पं विश्वय्ला काथकूगु प्रभावयात कयाः थन चर्चा याये, गुगु आः अमेरिकाया न्हूम्ह राष्ट्रपति जूम्हेसिनं भिंकेगु कुतः यायेमाःगु जुइ ।
राष्ट्रपति ट्रम्पं अमेरिका विश्वया महान देय् धकाः न्ह्याबलें धायेगु यानाच्वंगु दु। तर ट्रम्प राष्ट्रपति जुइधुंकाः याःगु छगू सर्वेक्षण कथं युरोपेली देशय् अमेरिकाया बारे सकारात्मक धारणा तइगु २० वर्षया दुने दकलय् म्हो जुयाच्वंगु दु। ४१ प्रतिशत बेलायती, ३१ प्रतिशत फ्रान्सेली, २६ प्रतिशत जर्मनतय् जक अमेरिका बारे बांलाःगु धारणा दु । मेपिंके ट्रम्प व ट्रम्पया महान अमेरिका बारे खास हे बांलाःगु धारणा मदु ।
राष्ट्रपति ट्रम्पं जलवायु परिवर्तनया बारे याःगु निर्णयं नं वय्कःयात विशेषत युरोपेलीतय्सं ययेकूगु खनेमदु। जलवायु परिवर्तनया खँय् गुबलें हे सकारात्मक धारणा मतःम्ह ट्रम्पं थः राष्ट्रपति जूगु खुला दुने हे विश्वया हे वैज्ञानिकत असन्तुष्ट जुइकथं २०० गू देशं हस्ताक्षर यानातःगु पेरिस जलवायु सम्झौतापाखें अमेरिकायात अलग तयेगु घोषणा यात । थ्व सम्झौताय् विश्वय् अप्वयाच्वंगु तापक्रमयात २ डिग्री सेल्सीसर क्वकायेगु महत्वपूर्ण घोषणा यानातःगु खः । चीन धुंकाः अमेरिका दकलय् अप्वः हरितगृह ग्यास उत्सर्जन याइगु देय् खः, उकिं अनुसन्धानकर्तातय्सं राष्ट्रपति ट्रम्प हाकनं निर्वाचित जुल धाःसा विश्वया तापक्रम वृद्धि नियन्त्रण यायेगु असम्भव जुइगु तकं धया वयाच्वंगु खः ।
अथेहे राष्ट्रपति ट्रम्पं थःगु सत्ताय् वःगु छवाः लिपा हे मुस्मां बाहुल्यता दुगु न्हय्गू देय्या नागरिकतय्त अमेरिका प्रवेशय् प्रतिबन्ध तयाबिल । आः नं १३ गू देय्या नागरिकतय्त अमेरिकाय् दुहां वयेत कडा यानातःगु दु। थुकिं यानाः यक्व मुस्मां देय्त ट्रम्प खनाः तंम्वयाच्वंगु दु । ट्रम्पं बलजफ्ती हे मेक्सिकोलिसेया सीमाय् पःखाः दन। अक्टोवर तकया दुने थन ३७१ किलोमिटर पःखाः ग्वयेधुंकूगु दु, अथे खःसां थ्व पखालं अमेरिका दुहां वये चाहे जूपिंत पने धाःसा फयाच्वंगु मदुनि । अमेरिका व मेक्सिकोया सीमाय् सन् २०१९ य् १२ वर्ष दुनेया दकलय् अप्वः आप्रावासी मुनाच्वंगु दु ।
अथेहे ट्रम्प ‘फेक न्यूज’ धयागु शब्दयात हे चर्चित यानाबिल । थःत मयःगु, थः सहमत मदुगु समाचार जुल कि हे ट्रम्पं ‘फेक न्यूज’ (गलत समाचार) धायेगु यात । सन्े २०१७ तकया दुने वय्कलं तःगू हे समाचार संस्थायात अमेरिकी जनताया शत्रु कथं चित्रित यानाबिल । गुकिं यानाः यक्व हे समाचार संस्थात ट्रम्प खनाः तम्वल । थुकिया हे लिच्वः धायेमाः थुगुसी चुनावय् अमेरिकी समाचार संस्थातय्सं ट्रम्पयात खास हे साथ मबिल ।
चीनलिसेया तनावं नं राष्ट्रपति ट्रम्प चर्चाय् वयाच्वन । महान अमेरिका, अमेरिका दकलय् न्हापां धयागु थःगु नारायात सार्थक यायेगु नामय् ट्रम्पं चीनलिसे दुश्मनी हे यात । विश्वया दकलय् तःधंगु अर्थतन्त्र जुयाच्वंगु अमेरिकायात लिफ्यायेत वयाच्वंम्ह चीनलिसे व्यापार युद्ध हे यात । चीनया प्रविधियात प्रतिबन्ध तयेगु निंतिं विश्वय् हे लबिङ यानाजुल । चिनिया सञ्चार कम्पनी हुवावेया प्रविधि छ्यःगु देय्यात तकं प्रतिबन्ध तयेगु ख्याच्वः बिल । थुकिं चीन ट्रम्प खनाः तसकं तम्वःगु जुल । लिसें अमेरिका लिसेया स्वापू नं न्हियान्हिथं स्यना वनाच्वंगु दु। निगुलिं देशं थःथःगु देशय्त यातःगु महावाणिज्य दूतावास बन्द याकेगु ज्या तकं जुल । अमेरिकां हुवावे जक मखु टिकटक थेंज्याःगु तसकं लोकंह्वाःगु चिनियाँ एपत अमेरिकाय् प्रतिबन्ध तयाबिउगु दु । अथेहे ताइवानया राष्ट्रपतिलिसे सम्वाद यानाः चीनलिसे तप्यंक ल्वापुया पुसा पिउगु दुसा हंगकंगय् नं हस्तक्षेप यानाः चीनयात उक्से यायेगु ज्या यानाच्वंगु दु। कोरोना भाइरस सुरु जुइधुंकाः विश्व स्वास्थ्य संगठनं तकं थुकियात छुं नं देय्या नां मवयेक कोभिड १९ धायेगु घोषणा यायेधुंकाः तकं ट्रम्पं थुकियात चाइना भाइरस हे धायेगु यानाच्वंगु दु ।
ट्रम्पया थज्याःगु ज्यां अमेरिका व चीन दथुइ छगू कथं शीतयुद्ध हे न्ह्यानाच्वंगु दु। आः राष्ट्रपति जुइम्ह बाइडेनयात चीनलिसेया स्वापू बांलाकेगु नं छगू चुनौति दु। बाइडेनं नं अमेरिकायात लिफ्यायेत वयाच्वंम्ह चीनलिसे गज्याःगु स्वापू दयेकी धयागु धाःसा स्वये हे ल्यंदनि । चीनया मामिलाय्धाः सा बाइडेन राष्ट्रपति वयेधुंकाः निगू देय् दथुया स्वापुतिइ खास हे हिउपाः वइगु खनेमदु। बाइडेनं नं चीनया राष्ट्रपति सी जिनपिबयात ‘ठग’ धकाः धायेधुंकूगु दु ।
मेखे मध्यपूर्वय् नं यक्व देय् ट्रम्प खनाः तम्वयाच्वंगु दु। इराकय् सैनिक कारवाही यानाः इरानया दकलय् शक्तिशाली सैनिक अधिकारी कासिम सुलेमानीया हत्या यानाबिउगु दु। थुकिं अमेरिका व इरान दथुइ युद्धया स्थिति तकं हयाबिउगु खः । मेखे इजरायलयात मिखा तिसिनाः समर्थन यायेगु ट्रम्पया व्यवहार नं मेमेगु अरबी देय्त तम्वयाच्वंगु दु । आः अमेरिकाया न्हूम्ह राष्ट्रपति जुइम्हेसित विश्वय् अमेरिकाया छवि स्यनाच्वंगुयात भिंकेगु तःधंगु चुनौति दु। अमेरिकाय् डेमोक्र्याटपाखें राष्ट्रपति वइबलय् अप्वः थें विश्वलिसे स्वापू बांलाइगु ला जुयाच्वंगु दु, आः बाइडेनं जक छु याइ धयागु स्वये ल्यं दनि ।
LEAVE YOUR COMMENTS