पाखण्डी सु खः ?

कोभिड-१९ अर्थात कोरोना भाइरसं देय्न्यंकं भयावह, विकराल रुप कया हयाच्वंगु दु। विशेष यानाः स्वनिगलय् संक्रमिततय् ल्याः न्हियान्हिथं अप्वया वनाच्वंगु दु। मृत्यु दर नं अप्वया च्वंगु दु । खतुं थ्व कोभिड-१९या संक्रमण विश्वन्यंकं हे वःगु खः । नेपालय् वये न्ह्यः चीन, युरोपय् थ्व ल्वचं गाक्कं दुःख बीधुंकूगु खः । क्षति यायेधुंकूगु खः । नेपालय् नं थ्व ल्वय्या संक्रमण वइगु सम्भावनायात चिउताः तयाः लकडाउन याइ । शुरुइ लकडाउन याःगु इलय् नेपालय् थ्व ल्वय्या संक्रमण उलि तच्वः मजूनि । तसकं हे म्हो ल्याखय् जक संक्रमित खने दुगु खः ।

तर संक्रमणयात पनेगु उद्देश्यं लकडाउन याःसां देशं पिनें वइपिं मनूतय्त पने मफुत । फलस्वरुप लकडाउनया बावजुद नं कोरोनाया संक्रमण अप्वया वन । थौं वयाः ला देय् कोरोनाया संक्रमणं बांमलाक प्रभावित जुइधुंकूगु दु । छखेर कोरोनाया संक्रमणं विकराल रुप कया हयाच्वंगु दुसा मेखेर जनस्वास्थ्यप्रति पूर्णरुपं दायित्व बहन याये माःम्ह सरकार थःगु दायित्वपाखें पलायन जुइगु दाउ छ्यलाच्वंगु दु ।

आः कोरोनापाखें संक्रमित जूपिंसं परीक्षण व उपचार थःथःपिनिगु खर्चय् यायेमाः। ल्वगि जनताया जिम्मेवारी आः सरकारं काये मफइगु स्पष्ट व निर्लज्जपूर्ण घोषणा यानाः सरकार जनताप्रतिया जिम्मेवारीं बिसिउँ वनेत स्वयाच्वंगु दु। खुला न्ह्यः देशय् उलि संक्रमित मदुगु इलय् लकडाउन यानाः अनेक प्रचार प्रसारया माध्यमं सरकारं जनस्वास्थ्यया निंतिं तःधंगु तयारी यानागु दावा याना क्यंगु खः । तर आः वयाः देय् धाथेंया कोरोनाया प्रकोपय् लाः वल । सरकार झन जिम्मेवार जुइमाःगु इलय अःखबतं जनताप्रतिया दायित्वपाखें लिचिलाः सरकारं जनस्वास्थ्यया जिम्म कयाच्वने मफइगु खँ खुल्लखुल्ला धयाच्वन ।

खुला न्ह्यः देशय् उलि संक्रमित मदुगु इलय्ल कडाउन यानाः अनेक प्रचार प्रसारया माध्यमं सरकारं जनस्वास्थ्यया निंतिं तःधंगु तयारी यानागु दावा याना क्यंगु खः । तर आः वयाः देय् धाथेंया कोरोनाया प्रकोपय् लाः वल ।

थज्याःगु महाप्रकोपया इलय् देशय् संकटकाल घोषणा यानाः जूसां सरकारं जनस्वास्थ्यप्रति पूर्णरुपं जिम्मा कायेमाःगु इलय् अःखबतं जनताया उपचार निःशुल्क याये मफइगु घोषणा यानाः ‘जनता थःथःगु भाग्यकथं न्ह्याइ’ धइगु आशय प्वंकाच्वंगु दु । मेखे देशय् आम जनता नं ध्यबा पुलाः उपचार याकेगु सम्भावना नं तसकं हे कमजोर जुयाच्वंगु दु। संक्रमितया ल्याः न्हियान्हिथं अप्वयाच्वन । वासः याकेत अस्पतालय् थाय् हे मदु। माःगु उपचार मदयाः नं थौं गुलिखे ल्वगित अकालं सी मालाच्वंगु दु । लकडाउनया इलय् देशय् संक्रमणया चाप मदुगु इलय् सरकारं देशय्व येफइगु संक्रमणया विकराल स्थितिया पूर्वानुमान यानाः माःगु दक्व फुक्क व्यवस्था यायेमाःगु खः ।

कोरोना उपचारया निंतिं अस्पतालया ल्याः अप्वयेकाः माःमाःगु उपकरणत इलय् हे व्यवस्था यायेमाःगु खः । स्वास्थ्यकर्मितय्त इलय् हे परिचालित यायेगु योजना दयेकेमाःगु खः । वइगु संकटकालयात विचाः यानाः सरकारयात माःगु योजना व व्यवस्था यायेत गाक्कं ई मदुगु मखु। तर इलय् हे वइगु खतराया आंकलन मयासे सरकार जनताया स्वास्थ्यप्रति भ्याः भचा हे चिन्तित जूगु खने मंत । थौं वयाः सरकारं थःगु ल्हाः तुति त्वःताः जनतायात धोखा बीत लिफः मस्वल ।

थीथी जःलाखःला देशय् कोरोनाया संक्रमण म्हो जुया वयाच्वन । तर नेपालय् संक्रमण म्हो जुइगु लक्षण खनेमदु। थौं देश कोरोनां जक पीडित मखु। उपचारया अवसर मदुगु, उपचार खर्चया कारणं जनता झन् दुगंछि पीडित जुइ मालाच्वंगु दु। ततःधंगु अस्पतालं कोरोनाया उपचारया निंतिं लखौं तका दां कयाच्वंगु दु । सामान्य जनतां थज्याःगु उपचार याके फइगु स्थिति मदु । देशय् सरकार सामान्य जनताया निंतिं सदां दनेमाःगु खः । उकिसनं सच्चा कम्युनिष्ट सरकार सामान्य जनताया निंतिं हे समर्पित जुइ । जुइमाः । प्रधानमन्त्रीं धाइ वासः याके मफुगुया स्वघोषणा याःपिंत सरकारं स्वइ । जनतायात फ्वगिं खंकेगु कम्युनिष्ट प्रधानमन्त्रीया थ्व धुर्तता खः । पर्यटनमन्त्री धाःम्ह छम्ह पाखण्डी कम्युनिष्ट दु। छगू अन्तर्वार्ताय् वं धाइ, ‘ध्यबा दुपिंसं लाखौं फुकी, छाय् कपाः स्याकेगु ?’ मन्त्रीजु ! ध्यबा मदुपिं वासः मयाकुसे सी मालीगु खःला ? मन्त्रीजु छगू अन्तर्वार्ताय् छिं डा. गोविन्द के.सी. पाखण्डी धाःगु खँ लुमना वइ । पाखण्डी सु? निर्णय यायेगु ई वःगु दु ।

सम्बन्धित बुखँ

LEAVE YOUR COMMENTS