ने. सं. ११४६ बछलागा नवमी -

न्हूगु गठबन्धनया सम्भावना गुलि दु?

काँग्रेस, माओवादी, एकीकृत समाजवादी व जसपाया आःया गठबन्धनं मन्त्रिमण्डलया पूर्णता बीफुगुृ मखुनि । थ्व सिकं नं काँग्रेस एमसिसीया हर्ताकर्ता हे खः धाःसा माओवादी, एस संशोधन मयायेकं पास यायेमजिउ धकाः धाइगु पक्षय् दु, जसपाय् दुने डा. बाबुराम भट्टराई छम्ह जक व्यक्तिगत रूपं एमसिसीया पक्षय् दु धाःसा उपेन्द्र यादवपिं थ्व सवालय् मौन च्वनेगु हे कतिलाः धकाः धाइगु दु । मेखे काँग्रेस सत्ताया पुलांम्ह खेलाडी जुयाः कर्मचारीतन्त्र, सेना, पुलिस आदिइ नं पकड दुगु शक्ति खः धाःसा मेपिं पुलांगु सत्ताया संयन्त्रनाप संघर्ष याइपिं व आः जक भचाभचा दयेका हःपिं खः ।

पुलांगु दरवारया पक्षय् ज्या याना च्वंपिसं नं दरबार मदयेवं छुं ज्याखँ यायेमाल धाःसा ज्या काइगु शक्ति नं नेपाली काँग्रेस हे खः धाःसा माओवादीं नेपालय् दरबार उडे यानाः इमित हाःनाः मदयेका बिउगुलिं माओवादीयात ला मिखा बागलं नं स्वयेमयःगु खँ ला पिहाँ वयाच्वंगु हे दु । छुं पदय् मदुसा प्रचण्डयात लीगु ज्या मयाःसा ला जा नःगु हे पचे मजुइपिं ख्वाः वःपिं मनूत नं झीसं खना हे च्वनागु दु ।

माओवादी नायः प्रचण्डं आःया सत्तारुढ गठबन्धनयात क्वःथलेगु कुतः जुयाच्वगु तर गठबन्धन कायम हे यायेगु खँ एमसिसी न्वकू फातिमा सुमार नेपाः वयेसिकं न्ह्यः हे न्ववाःगु खः । फातिमा सुमारया भ्रमण जुयाच्वंगु इलय् माओवादी नायः प्रचण्ड व माधव कुमार नेपाल संशोधन मयासें एमसिसी पास मयायेगु पक्षय् खनेदुगु व एमालेया नायः केपी शर्मा ओलीं धाःसा थःपिं सरकारय् दुबलय् पेश यानागु खः, तर आः प्रतिपक्षय् दुगुलिं सरकारी पक्षया धारणा नि न्हापां वयेमाःगु खँ पिकाल । थ्व धुंकाः हे एमसिसी पास यायेगु नितिं काँग्रेस एमालेया गठबन्धन तयार यायेफुगु खँ नं पिहाँ वःगु खः । स्

वयं शेर बहादुर देउवां केपी ओलीयाथाय् दूत छ्वत धाःगु खँ नं पिहाँ वःगु खः । हानं थ्व हे झ्वलय् सरकारं हःगु न्यूनतम मंकाः ज्याझ्वलय् एमसिसीया खँ ग्व ? धकाः भाषणय् न्ह्यसः छूगु नं खः धाःसा लिपा शेर बहादुर देउवां थ्व खँ प्रचण्डं मतयेकूगु धकाः नं धाःगु खः । थ्व खँ नं थुथाय् न्ह्यथने बहः जू । थ्व स्वयेबलय् अमेरिकां हे आः एमसिसी पास यायेगु नितिं काँग्रेस एमालेया गठबन्धन तयार याके बीगु खःला धाइगु नं आशंका जुइगु स्वाभाविक हे खः ।

केपी ओलीया सरकारं निक्वःतक संसद विघटन याःगुयात प्रचण्ड व माधवपिसं प्रतिगमन धकाः धाःगुया अर्थ नेपालय् संघीयता, गणतन्त्र व धर्मनिरपैक्षतायात सिधयेकेगु कुतः कथं ज्या जूगु धकाः धाःगु खः । नेपलाय् संघीयता खारेज जुइमाः, अभिभावकया रूपय् जुजु तयेमाः अले हिन्दू राष्ट्र जुइमाः धकाः ला प्रत्यक्ष जुजुवादी व हिन्दूवादी ला हालाच्वंगु हे दु । भारतय् भाजपा सरकार वा संस्थापन पक्ष नं थुकिया पक्षय् दु धकाः खँ पिहाँ वयाच्वंगु हे खः । थुकी भारतीय प्रधानमन्त्री ला ब्याकय् दुगु हे जुल, न्ह्यःने सनाजुइगु ज्या उत्तरप्रदेशया मुख्यमन्त्री आदित्यनाथ योगीं यानाच्वंगु जुल ।

थन राष्ट्रपति शासन वइगु, संकटकाल न लगे जुइफइगु धाइगु हल्ला नं न्यनाच्वंगु व न्यंंके बियाच्वंगु खः । अले केशर बहादुर विष्ट थुज्वःपिं पूर्व पञ्चत न सगठन चायेकाः मनू मुंकाः जूगु हे खः । थुलि जक मखु नेपाःया औपचारिक नां हे संघीय लोकतान्त्रिक गणतन्त्र मखसें नेपाल धकाः जक च्वयेगु धकाः नं परिपत्र जूुगु हे खः । थ्व स्वयेबलय् केपी ओलीया सरकार दुबलय् राजतन्त्र पुनस्र्थापनाया निति खिचडी थुइगु ज्या जुयाच्वंगु खनेदु । मेखे केपी ओलीयात नं बयलगाडाया खँ ल्हाइम्ह गणतन्त्र विरोधी धकाः ला धयाच्वंगु हे खः ।

संघीयताया आन्दोलन जुयाच्वंगु इलय् संघीयता विरोधी पुलांगु दरबारिया शक्तितसें जुजुया थासय् केपी ओलीयात नेता माने याःगु तर माओवादीनाप एकता यानाः चुनाव ल्वायेगु व एकीकरणया ज्या याःबलय् ओलीयात त्वःता वंगु खँ नं न्ह्यथनेबहः जू । नेकपा जुयाच्वंगु इलय् नेकपाया ख्यलय् चीनया राजदूतया खँ चले जूगु खनेदुबलय् दरबारियातसें नं काँग्रेसलिसे गठबन्धन दयेकेत स्वःगु व भारतीयतसें नं काँग्रेसयात हे ल्हाःतय् काःगु खँ पिहाँ वःगृ खः । थुथाय् भारतय् नं काँग्रेस आईया समर्थक बुद्धिजीवीपिं गणतन्त्रयात ल्यंकातयेमाः धाइगु पक्षय् वनाः नेकपाया समर्थक जूगु व भाजपा वा भारतीय संस्थापन पक्ष जुजु हयेगु पक्षय् खनेदुगु खँ नं खनेदुगु खः ।

चीनया राजदूतं नेकपाया एकता बचे यायेत केपी ओलीं त्याग क्यनेमाः धकाः धाःगु व वयांलिउ केप ीओली भारतपाखे फस्वयाः लिनावगु इलंनिसें नोपलय् हानं मेगु गेम खनेदुगु खः । भारतीय जासुसी संस्था रअया नायः सामन्त गोयल नेपाः वयाः केपी ओलीनाप चान्हय् ३ घौ खँ ल्हाःगु प्रकरणं निसें मेगु गेम सुरु जूगु थुथाय् न्ह्यथनेबहः जू । थ्व गेमकथं हे संसद विघटन जूगु आकलन दु । थुकियात नेपाली काँग्रेसं नं विरोध याःसां छगू हे मोर्चा दयेकाः आन्दोलन यायेगु धाइगु प्रस्तावयात धाःसा काँग्रेसं अस्वीकार यात । देउवायात प्रधानमन्त्री जुइमाल धकाः रामचन्द्र पौडेलपिसं धालं नं सफल मजुृइगु ज्याय् ल्हाः तयेमखु धकाः देउवा सुम्क हे च्वनाबिउगु खँ नं लुमके बहः जू ।

प्रचण्डं थःगु एजेन्डा संघीयता, गणतन्त्र व धर्मनिरपेक्षताय् काँग्रेस व एमाले थुज्वःगु संसदवादी दलतय्त नं हयेत सफल जूगु धाइगु तःधंगु खँ खः । तर संसदवादी दलतय्त हे प्रधानमन्त्री बियाः थ्व ज्या सफल याना काःगु खः । संसदवादीत वैचारिक रूपं हे संघीयता, गणतन्त्र व धर्मनिरपेक्षताया पक्षय् वःगु मखु । अथे जूगुलिं यानाः थ्व पक्ष दुस्यः बल्लायेधुंकूगु पक्ष मखु । केपी ओलीया योजनायात असफल यायेत देउवायात प्रधानमन्त्री दयेकाः न्ह्यायेत ला सफल जुल । तर पुलांगु सत्ताया तत्वतसें आः देउवायात हे ल्हाःतय् कयाः देउवा व केपी ओली मिले याकाः थःगु योजना न्ह्याकेत स्वइगु संकेत ला खनेदयेधुंकूगु दु । उकिं आःया स्थिति संगीन हे खः ।

मेखे केपी ओलीं एमाले दुने थः जोरापिं नेतातय्त प्यंकाः चेलाराम व चेलाराम मखुसां सुद्र्यःचिं व पार्टीया नां चुनाव ल्वायेत माः धकाः धाइपिनि जमात मुंका तःगु दु । अन दुने ओलीयात च्यालेन्ज यायेफुपिं खास मनूत मदु । अले सुप्रिप कमाण्डर बराबर जुल । तर माओवादी दुने नं लोभीपिं आपाः दयाः लवः मदुसां एमालेय् वनेत स्वइपिं दयाः म्यानेज यायेत हे थाकुगु अवस्था जुइधुंकल धाःसा माधव नेपालया हालत ला वसिकं भज्यं । मन्त्री जुइमखन धाःसा ला मेगु हे पार्टी चायेके धाइपिं दु । उपेन्द्र यादवया हालत नं उकथ हे दु । अथे जुुयाः हे मन्त्रिमण्डल गठन जुइत लिबाःगु खः धकाः ला पिहाँ वयाचवंगु हे दु । थुज्वःगु हे अवस्था जुयाच्वन धाःसा थ्व हे त्वहलय् देउवां त्वहःमदु त्वहः दयेकाः नं न्हूगु गठबन्धन धकाः एमाले व महन्थ ठाकुरया लोसपा नाप गठबन्धन तयार यायेफु । आःयात न्हूगु गठबन्धन दयेकेत धाःसा संविधान कथं प्राविधिक समस्या दु । सरकार अल्पमतय् मलाःसें गथे मिले जुइ? थ्व हे समस्या खः । एमसिसी पेश यात धायेवं राष्ट्रिय जनमोर्चां ला समर्थन त्वःती । तर मूल समर्थन त्वःते माःपि धाइपिं माओवादी व एस पार्टी हे खः । इमिसं हे गठबन्धन दयेकूगु जूगुलि इमिसं हे त्वःतीमखु जुइ । थ्व हे ल्याखं जक थुगु गठबन्धन कायम जुयाच्वंगु खःकि?