स्वास्थ्यमन्त्रीयात दछि कैदया माग

येँ (नेपालभाषा टाइम्स) – सर्वोच्च अदालतया आदेश अवहेलना याःगु धासें स्वास्थ्य मन्त्री भानुभक्त ढकाल विरुद्ध म्हिगः सर्वोच्च अदालतय् मुद्दा दर्ता जूगु दु । थ्व स्वयां न्ह्यः वंगु आइतवाः प्रधानमन्त्री केपी शर्मा ओली व स्वास्थ्य मन्त्री ढकाल विरुद्ध मुद्दा दर्ता यायेगु कुतः जूगु खःसां सर्वोच्च अदालत प्रशासनं प्रम ओली थुकिया विपक्षी मखुगुलिं मुद्दादर्ता यायेत अस्वीकार याःगु खः । म्हिगः स्वास्थ्य मन्त्री ढकालयात जक विपक्षी दयेकाः सर्वोच्चय् मुद्दा दर्ता याःगु खः ।

कोरोना भाइरसं संक्रमित जूपिंत निःशुल्क परीक्षण व वासः यायेत सर्वोच्च अदालतं असोज १५ गते परमादेश जारी याःगु खः । असोज २७ गते सार्वजनिक याःगु फैसलाया पूर्ण पाठय् कोरोनाया निःशुल्क उपचार यायेगु दायित्व सरकारया जूगु व संविधानय् न्ह्यथनातःगु विषययात उखेथुखे यायेगु अधिकार सुयातं मदुगु खँ न्ह्यथनातःगु खः ।

सरकारं सर्वोच्चया उगु आदेशयात उल्लंघन यासें असोज १९ गते च्वंगु क्याबिनेटं निःशुल्क उपचार मयायेगु निर्णय याःगु खः । संविधानया धारा ३५ य् नागरिकया निःशुल्क स्वास्थ्य उपचार यायेमाःगु ग्यारेन्टी यानातःगु दुसा सरकारं उकियात उल्लंघन याःगु खः ।