ससफो व हाम्रो कम्युनिष्ट एकीकरण

येँ – संघीय समाजवादी फोरम (ससफो) नेपाल व हाम्रो कम्युनिष्ट पार्टी नेपाल दथुइ एकीकरण जूगु दु । वंगु शनिवाः थन जूगु छगू ज्याझ्वःया दथुइ निगू पार्टी एकीकरण जूगु घोषणा याःगु खः । ज्याझ्वलय् ससफोया अध्यक्षलिसें उपप्रधानमन्त्री उपेन्द्र यादवं खादा क्वखायेकाः व सहअध्यक्षलिसें प्रतिनिधिसभा सदस्य राजेन्द्र श्रेष्ठं सिन्हः तिकाः पार्टीइ एकीकृत जूपिं नेता कार्यकर्तातय्त लसकुस यानादीगु खः ।

अथे हे हाम्रो कम्युनिष्ट पार्टीया महासचिव हिरालाल भुजेलं थःगु पार्टी ससफो नेपालय् एकीकृत जूगु घोषणा यानादीगु खः । ज्याझ्वलय् नवासें उपप्रधानमन्त्रीलिसें ससफोया अध्यक्ष यादवं कांग्रेस व कम्युनिष्ट पार्टीतय्सं बांलासे च्वंगु देय् नेपाःयात फ्वनाः नइगु देय् दयेकूगु द्वपं बिसें इमिगुपाखें देय्या समृद्धि व समाजवादया सम्भावना मदुगु जिकिर यानादिल ।

वार्ता समितिया संयोजकतकं जुयादीम्ह पार्टी सहअध्यक्षलिसें सांसद श्रेष्ठं ससफो नेपाल न्हूगु धंगया पार्टी जूगु धासें पार्टीइ एकीकृत जूपिं सुयात नं आग्रह पूर्वागंह मतसे योग्यता व क्षमताकथं जिम्मेवारी बिया वनेगु जुइ धयादिल ।

ज्याझ्वलय् ससफोया उपमहासचिवलिसें वार्ता समितिया दुजः प्रकाश अधिकारी, पार्टी केन्द्रीय दुजः नापं प्रदेश नं. ३ या इन्चार्ज आङदेन्दी शेर्पा, हाम्रो कम्युनिष्ट पार्टीया महासचिव भुजेल, उगु पार्टीपाखें वार्ता समितिया संयोजक देवराज घिमिरे, संगठन विभाग प्रमुखलिसें सुदूरपश्चिम इन्चार्ज राजेन्द्रबहादुर विष्टं नं थःथःगु धारणा तयादीगु खः ।

थ्व हे झ्वलय् संघीय समाजवादी फोरम (ससफो) नेपालया येँ महानगरपालिका १७ वडाया न्हापांगु अधिवेशन जूगु दु । अधिवेशनं क्रान्ति मालाकारया अध्यक्षताय् झिंस्वम्हेसिया न्हूगु वडा समिति नं गठन याःगु दु । न्हूगु वडा समितिइ पुष्पलाल नकःमि उपाध्यक्ष, लहना श्रेष्ठ सचिव, किशोर कनौजिया कोषाध्यक्षय् च्वनादीगु दुसा दुजलय् पूर्णलाल तण्डुकार, सुशान्तमान श्रेष्ठ, बलभाई पुजारी, गणेशलाल मगैया, नारायणप्रसाद मालाकार, सन्तोष डंगोल, जनम महर्जन, राजेन्द्र महर्जन व सुरेश खड्गी च्वनादीगु दु ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु