चीनं मानवता विरोधी अपराध यानाच्वंगु द्वपं

एजेन्सी- अन्तर्राष्ट्रिय मानवअधिकारवादी संस्था एमनेष्टी इन्टरनेशनलं चीनं उइगर व मेमेपिं मुस्मां अल्पसंख्यकत च्वनीगु उत्तर पश्चीम क्षेत्र शिन्जियाङय् मानवता विरोधी अपराध यानाच्वंगु द्वपं बिउगु दु ।
एम्नेष्टीं बिहिवाः छगू प्रतिवेदनय् पिथँसें चीनं उइगर, काजाख व मेमेगु मुस्मां समुदायया मनूतय्त मंकाः रुपं कुनातयेगु, निगरानी यायेगु व यातना बीगु यानाच्वंगु द्वपं बिसें संयुक्त राष्ट्र संघयात थुकी अनुसन्धान यायेत इनाप नं याःगु दु ।

एमनेष्टी इन्टरनेशनलया महासचिव एग्निस् क्यालामार्डं चिनियाँ अधिकारीतय्सं तःधंगु स्तरय् नर्कया थेंज्याःगु वातावरण सिर्जना यानाच्वंगु द्वपं नं बियादीगु दु । थ्व झ्वलय् वय्कलं राष्ट्र संघया महासचिव एन्टोन गट्रेसं थःगु म्यान्डेट कथं ज्या याये मफुगु द्वपं नं बियादीगु खः ।

बिबिसी लिसे खँ ल्हासें क्यालामार्डं महासचिवं शिन्जियाङया अवस्थायात कयाः आःतकं अन्तर्राष्ट्रिय अनुसन्धानया आह्वान मयाःनि धयादीगु दु । वय्कलं धयादीगु दु, ‘संयुक्त राष्ट्र संघया स्थापना जूगु हे मूल्य मान्यतायात रक्षा यायेत खः । उकिं मानवता विरोधी अपराधय् सुम्क मच्वनेगु जिम्मेवारी वय्कःयागु खः ।’

न्हापा कुनातःपिं ५५ म्ह थुनुवातय् अन्तर्वार्ताय् आधारित जुयाः एमनेष्टीं १६० पृष्ठया थ्व प्रतिवेदन पिकाःगु खः । प्रतिवेदनय् धयातःगु दु, ‘मनूतय्त कुनातय्गु, वये वने यायेगु अधिकारयात गम्भीर रुपं सीमित यायेगु, अन्तर्राष्ट्रिय कानुनया आधारभूत नियमया उल्लंघन, यातना व दमन यायेगु मानवता विरोधी अपराधत अन जुयाच्वंगु दु ।’

चीनयात छुं पश्चिमेली देय्त व मानवअधिकारवादी संस्थातय्सं न्हापां निसें शिन्जियाङय् च्वनाच्वंपिं टर्किक मूलया जातीय समुदायविरुद्ध आम नरसंहार याये स्वयाच्वंगु द्वपं बिइगु याना वयाच्वंगु दु । तर चीनं धाःसा थज्याःगु फुक्क कथंया द्वपंयात अस्वीकार यासें खण्डन याना वयाच्वंगु दु ।

चीनया धापू कथं शिन्जियाङया शिविरय् उगु क्षेत्रय् आतंकवाद विरुद्ध ल्वायेत संचालित स्वयंसेवी व्यावसायिक व कट्टरपन्थी धारणायात न्यूनीकरण यायेगु ज्याझ्वः खः । एम्नेष्टीइ आः पिकाःगु प्रतिवेदन न्हापा चर्चाय् वयाच्वंगु हे विषय जूसां थ्व प्रतिवेदनं यानाः शिन्जियाङयात कयाः चीनयात अन्तर्राष्ट्रिय दबाब तच्वयेफुगु खँ धाःगु दु ।