बैठक सःतेत दाहालयात दबाब

येँ – नेकपाया कार्यकारी अध्यक्ष पुष्पकमल दाहालयात याकनं हे पार्टीया बैठक सःतेत दबाब बीगु ज्या शुरु जूगु दु । पार्टी एकीकरण जूगु ताः दयेधुंकाः नं स्थायी समितिया बैठक च्वने फयाच्वंगु मदुनि । मेम्ह अध्यक्ष लिसें प्रधानमन्त्री केपी ओलीया स्वास्थ्य स्यना वनाच्वंगु व उपनिर्वाचन नं क्वचायेधुंकूगुलिं सचिवा– लय बैठक तयेत दाहालयात दबाब अप्वया वंगु खः ।

दाहालयात बैठक च्वनेगु निंतिं नारायणकाजी श्रेष्ठ, झलनाथ खनाल व माधव नेपालपिंसं दबाब बियाच्वंगु खँ सीदुगु दु । तर अध्यक्ष दाहालं धाःसा ओली विरामी जुयाः अस्पताल भर्ना जुयाच्वंगुलिं तत्काल सचिवालय बैठक सःतेत आनाकानी यानाच्वंगु दु । दाहालं ओली अस्पतालं डिस्चार्ज जुइधुंकाः जक सचिवालय बैठक तयेगु तयारी यानाच्वंगु दु ।

सचिवालय बैठक च्वनेमाः धयाच्वंपिं नेतातय्सं बैठक लिपा स्थायी समितिया बैठक नं सःतेमाःगु आवश्यकता जूगु खँ धयाच्वंगु दु । मेखे पार्टी नेता जनार्दन शर्मां प्रम ओलीयात छुं भचा आराम जुइवं अध्यक्ष दाहालं बैठक सःतीगु खँ धयादीगु दु । सचिवालय बैठक लिपा हे स्थायी समिति व केन्द्रीय समितिया बैठक च्वनेगु कथं दाहालं तयारी यानाच्वंगु दु ।

सम्बन्धित बुखँ

LEAVE YOUR COMMENTS