नेपाः अतिकम विकसित देय्या धलखं पिहां वइ कि मवइ

येँ – नेपाःयात अतिकम विकसित देय् (एलडीसी)या धलखं पिने हयेगु कि महयेगु धयागु बहस सुरु जूगु दु । संयुक्त राष्ट्र संघया विकास नीति सम्बन्धी समिति सिडीपीया बैठकं नेपाःयात अतिकम विकसित देय्या धलखं पित हयेगु सम्बन्धय् समीक्षा बैठक च्वनेत्यंगु इलय् नेपाःया विज्ञतय् दथुइ नेपाःयात थ्व धलखं पिने हयेगु कि महयेगु धयागु खँयात कयाः बहस सुरु जूगु खः ।

छथ्वः अर्थविद्तय्सं नेपाः आः थ्व धलखं पिहां वयाः थःगु स्तर थकायेमाःगु खँ धयाच्वंगु दुसा छुं अर्थविद्तय्सं धाःसा व्यापार व बजार पहुँचया निंतिं अतिकम विकसित देय्तय्त बियातःगु सुविधायात स्वयाः आः तुरुन्त थ्व धलखं पिहां वये मजिउनिगु सुझाव बियाच्वंगु दु ।
संयुक्त राष्ट्र संघया मापदण्ड कथं नेपाः सन् २०१८ य् अतिकम विकसित देय्या धलखं पिहां वयेफइगु जुइधुंकूगु खः । तर उबलय् सरकारं थप स्वदँया निंतिं नेपाः थ्व धलखं पिहां मवयेगु निर्णय याःगु खः । संरासं स्वदँय् छक्वः देय्या विकास सम्बन्धी समीक्षा यानाः धलः दयेकेगु याइ ।

अतिकम विकसित देय्या धलखं पिहां वयेगु निंतिं राष्ट्र संघं प्रतिव्यक्ति आय १,२२२ अमेरिकी डलर दयेमाःगु, मानव सम्पत्ति सुचकांक ६६ व व स्वयां अप्वः दयेमाःगु व आर्थिक जोखिम सुचकांक ३२ वा व स्वयां म्हो दयेमाःगु मापदण्ड दयेकातःगु दु । थ्व स्वंगू मापदण्ड मध्ये निगू मापदण्ड पूवन धाःसा अतिकम विकसित देय्या धलखं पिहां वयेदइ । नेपालं सन् २०१८ य् हे प्रतिव्यक्ति आयया मापदण्ड बाहेक मेगु निगू मापदण्ड पूवंके धुंकूगु दु ।

छथ्वः अर्थविद्तय्सं दकलय् प्रमुख मापदण्ड जुयाच्वंगु प्रतिव्यक्ति आयया मापदण्ड हे पूमवंनिगु अवस्थाय् आः तुरुन्त हे अतिकम विकसित धलखं पिहां मवःसां जिउ धयाच्वंगु दु । नेपाःया प्रतिव्यक्ति आय अझ नं मापदण्ड स्वयां स्वसः डलर म्हो हे जक दु । अथेहे आः अतिकम विकसित देय्या धलखय् लानाच्वंगुलिं थीथी व्यापार सुविधा, बजार पहुँच, सहुलियतपूर्ण त्यासा, थीथी निकायया सदस्यता शुल्क थेंज्याःगुली यक्व सुविधा वयाच्वंगुलिं आः हे थ्व धलखं पिहां वये मजिउगु खँ अन्तर्राष्ट्रिय नागरिक समाज संगठनतय् सञ्जाल एलडीसी वाचया विश्वब्यापी संयोजक गौरी प्रधानं बीबीसीयात धयादीगु दु ।

मेखे अतिकम विकसित देय्या धलखं थहां वयाः न्यूनमध्यम आय दुगु देय्या धलखय् दुहां वल धाःसा मेमेगु फाइदा जुइगु खँ छथ्वः अर्थविद्तय्सं धयाच्वंगु दु । राष्ट्रिय योजना आयोगया पुलांम्ह अध्यक्ष डा. पोषराज पाण्डें थ्व धलखं पिहां वल धाःसा विश्वयात नेपाःया गतिशील अर्थतन्त्र खः धकाः क्यने दइगु व थथे जुल धाःसा विदेशी लगानी लिसें प्रविधि दुत हयेत अःपुइगु, क्रेडिट रेटिङ बांलाइगु खँ धयादीगु दु ।

वय्कःया कथं आः अतिकम विकसित देय्या धलखय् लाना वयाच्वंगु सुविधा नं नेपालं उपभोग याये फयाच्वंगु मदु । बजारय् पहुँच बियातःसां नेपालं निर्यात यायेगु उत्पादन हे मदुगुलिं थ्व सुविधा दयां नं छुं ज्या मवःगु बिचाः वय्कःया दु ।

राष्ट्र संघीय समितिया बैठक थ्व हे फेबु्रअरी २२ निसें २६ तक जुइत्यंगु दु । थ्व बैठकं नेपाःयात अतिकम विकसित देय्या धलखं थत हयेगु कि महयेगु निर्णय याइ । तर नेपालं आःतक थ्व धलखं पिहां वयेगु कि मवयेगु धयागु निर्णय बिउगु मदुनि ।

सम्बन्धित बुखँ

LEAVE YOUR COMMENTS