मेलम्चीया लः मोहनियात मवइगु

येँ -आखिर न्ह्याक्व हे हल्लाखल्ला व फाँय्फुइँ याःसां आः वइगु मोहनिबलय् नं स्वनिगःया जनतां मेलम्चीया लः त्वने मखनीगु जूगु दु । लः हयेगु लागिं जुयाच्वंगु सुरुङ म्हुइगु ज्या अझ नं क्वमचाःनिगु कारणं आः वइगु मोहनिबलय् नं मेलम्चीया लः मवइगु निश्चित जूगु खः ।
इटालीया निर्माण कम्पनी को–अपरेटिभ मुराटोरी सेमेन्टिस्टी दि रभेन्नालिसे जूगु सम्झौताया म्याद थपे याःसां नं वइगु असोज तक सुरुङ तक हे म्हुइ सिमधइगु खँ धाःगु दु ।

सरकारं आः वइगु मोहनि दुने मेलम्चीया लः त्वंकेगु धकाः प्रचार यानातःगु खः । वंगु स्वला तक ला निर्माण कम्पनीलिसे विवाद जुयाः ज्या हे मजूगु खःसा अन हानं ज्या सुरु जूगु हे लत्या तिनि दत । आः न्ह्याक्व हे तीव्र गतिं ज्या याःसां नं मोहनि तक लः हये मफइगु खँ मेलम्ची परियोजनां धाःगु दु । थ्व आयोजनाया लागिं ३१ अर्ब तकाया बजेट तयातःगु खःसा आः तक २५ अर्ब २० करोड खर्च यानाः ८३ प्रतिशत ज्या क्वचायेकेधुंकूगु दु ।

थ्वहे झ्वलय् मेलम्चीया लः वितरणया लागिं तयातःगु पाइप नं थाय्थासय् ज्वयाच्वंगु लूगु खँ परियोजनां धाःगु दु ।