आइसीयु तयेमाःपिं संक्रमित अप्वल

येँ (नेपालभाषा टाइम्स) – देशय् भेन्टिलेटरय् व आइसीयुलय् तयाः उपचार यायेमाःपिं कोरोना संक्रमित न्हियान्हिथं अप्वया वनाच्वंगु दु। स्वास्थ्य तथा जनसंख्या मन्त्रालयया कथं बिहिवाः तक देय्न्यंकं यानाः ३१४ म्ह संक्रमितत आइसीयुलय् तयाः उपचार जुयाच्वंगु दुसा ६८ म्हेसित भेन्टिलेटरय् तयाः उपचार यानाच्वंगु दु ।

मन्त्रालयं म्हिगः याःगु नियमित प्रेस ब्रिफिङ प्रवक्ता डा. जागेश्वर गौतमं बियादीगु जानकारी कथं प्रदेश १य् ३७ म्ह, प्रदेश २ लय् १९ म्ह, बागमति प्रदेशय् १७५, गण्डकी प्रदेशय् ६ म्ह, लुम्बिनी प्रदेशय् ५४ म्ह, कर्णाली प्रदेशय् १८ म्ह व सुदूरपश्चिम प्रदेशय् ५ म्ह संक्रमितयात आइसीयुलय्त याः उपचार यानाच्वंगु दु ।

अथेहे प्रदेश १ य् खुम्ह, प्रदेश २ लय् १, बागमति प्रदेशय् ५६ म्ह, लुम्बिनी प्रदेशय् निम्ह व सुदूरपश्चिम प्रदेशय् स्वम्हेसित भेन्टिलेटरय् तयाः उपचार यानाच्वंगु दु। बागमति प्रदेशय् दकलय् अप्वः आइसीयु व भेन्टिलेटर छ्यलेमाःगु धयागु स्वनिगलय् संक्रमिततय् ल्याः अप्वया वनाच्वंगुलिं खः ।

स्वनिगलय् बिहिवाः न्हिछिया दुने थप १ हजार ९३५ म्हेसित कोरोना संक्रमण पुष्टि जूगु दु। स्वास्थ्य मन्त्रालयया कथं येँय् १६९३ म्ह, ख्वपय् १३४ म्ह व यलय् १०८ म्हेसित कोरोना पुष्टि जूगु खः । म्हिगः न्हिछिया दुने देय् न्यंकं ३ हजार ७३९ म्हेसिके कोरोना संक्रमण खनेदुगु खः । थुकिया लिसें नेपालय् संक्रमिततय् ल्याः १ लाख २१ हजार ७४५ म्ह थ्यंगु दु । कोरोना संक्रमणया कारणं म्हिगः न्हिछिया दुने देय्न्यंकं यानाः १९ म्हेसिया ज्यान वंगु खः । नेपालय् कोरोना संक्रमणय् ज्यान वंपिं नं ६९४ म्ह थ्यंगु दु ।