‘संविधान मेगु हे च्वयेमाः’

येँ- संविधान संशोधनं जक आदिवासी जनजातिया मुद्दा संवोधन मजुइगु खँ विज्ञपिंसं धाःगु दु । म्हिगः येँया नेपाः बैंक्वेटय् ग्वसाः ग्वःगु छगू अन्तक्र्रिया ज्याझ्वलय् न्ववायेगु झ्वलय् वक्तापिंसं थुगु खँ धयादीगु खः । राजनीतिक विश्लेषक सिके लालं आः संविधान संशोधन धयां जक मगाः धासें संविधान हे मेगु च्वयेमाःगु खँय् बः बियादीगु खः ।
अथेहे हे राजनीतिक विश्लेषक युग पाठकं पहिचानया आन्दोलनया लिसेलिसें आर्थिक मुद्दायात नं स्वाना यंकेमाःगु खँय् बः बियादीगु दु ।

पाठकं नेपाःया पहिचानया मुद्दा आदिवासी जनजाति, थारु व मधेशीया जक मुद्दा मखु धासें नेपाःयात समृद्धि यायेगु मुद्दा जूगुलिं आर्थिक पक्षयात नं नापं यंकेमाः धयादिल । लिसें वय्कलं आदिवासी जनजातियाके गुगु ज्ञान दुगु खः, उकियात समृद्धि यायेगु हे धात्थें नेपाःयात समृद्धिया लँपुइ यंकेगु जुइ धासें वर्तमान सरकारं धयाच्वंगु समृद्धिं देय्यात समृद्धिया लँय् यंकीगु सम्भावना मदु धयादिल । लिसे वय्कलं पहिचानया आन्दोनल आयोग झ्वलय् उकिया वैचारिक स्पष्टता जुइमाःगु खँ नं धयादीगु दु ।

उकथं हे अन्तक्र्रिया ज्याझ्वलय् न्ववायेगु झ्वलय् मेम्ह राजनीतिक विश्लेषक विजयलाल कर्णं आदिवासी, जनजाति, मधेशी, थारु व उत्पीडित वर्गया अधिकार कायेगु खःसा मंकाः आन्दोलनया विकल्प मदुगु खँ धयादिल । न्हापा नं आपालं आन्दोलन जुइ धुंकूगु खःसां आदिवासी जनजाति, थारु, मधेशी व उत्पीडित जनताया अधिकार अझ नं मवःगु धासें आः न्ह्याइगु आन्दोलन राजनीतिक मखुसें पहिचानया आन्दोलन जुइमाः धयादिल ।

उकथं हे नेवाः न्ह्यलुवा लिसे मानवअधिकारकर्मी मल्ल. के. सुन्दरं आदिवासी जनजाति, थारु, मधेशी व दलितया आन्दोलनय् सम्बन्धित जातिया नेतात हे बाधक जूगु खँ धयादिल । वय्कलं न्हापांगु संविधानसभा लिपा नीस्वंगु राज्य पुनर्संरचना आयोगं १० प्लस १ या अवधारण हःगु खःसा उकिया विरुद्ध आदिवासी जनजातिया नेता व दलित नेतातय्सं तकं विरोध याःगु धासें थ्व हे विरोधया कारणं यानाः हे आयोगं हःगु अवधारणा लागू जुइ मफुगु खँ कनादिल ।

आयोगं सरकारयात सुझाव बीत प्रतिवेदन तयार यायेगु झ्वलय् जूगु सहलहय् राजनीतिक रुपं स्वयां नं जातीय रुपं निगू कित्ता जूगु खँ कनादिसें वय्कलं धयादिल, ‘उगु इलय् गुम्हेसिया आयोग दयेकूगु खः, उकी स्वम्ह ब्रम्हु, खुम्ह आदिवासी जनजाति, थारु, मधेशी व दलित लाःगु खः, स्वम्हेसिया धापू छगू हे जुइगु, अले खुम्हेसिया धापू छगू हे जुइगु, अथे खःसां नं ११ प्लस १ या अवधारण पारित जूगु खः ।’

नेपाः पार्टीया नायः विजयप्रकाश सैंजुया सभापतित्वय् जूगु ज्याझ्वलय् नेपाल आदिवासी जनजाति महासंघया उपाध्यक्ष गोविन्द छन्त्याल, आदिवासी जनजाति महासंघया पुलांम्ह महासचिव ओम गुरुङ, लिम्बुवान मुक्ति मोर्चाया कुमार लिम्बु, नेवाः न्ह्यलुवा डा. महेशमान शाक्य, थारु आन्दोलनया नेता लक्ष्मण थारुपिंसं सम्बोधन यानादीगु खः ।
सम्बोधनया झ्वलय् न्ववापिं फुक्कं धयाथें वक्तापिंसं वइगु फागुन १ गते निसें न्ह्याइगु थारुहट आन्दोलनया ज्याझ्वःयात समर्थन यायेगुया लिसे सक्रिय रुपं ब्वति कायेगु खँ धाःगु दु । वइगु फागुन १ गते थारुहट आन्दोलनं धनगढी आमरण अनसन यायेगु ज्याझ्वः तयातःगु दु ।

सम्बन्धित बुखँ

LEAVE YOUR COMMENTS