विप्लव पुचलय् पार्टी त्वःतीपिं अप्वल

येँ – सरकारं विप्लव पुचःयात प्रतिबन्ध तयेधुंकाः विप्लवया छुं नेता कार्यकर्तातय्सं पार्टी त्वःते फइगु सम्भावना दुगु खँ सीदुगु दु । विप्लव पुचःया स्वनिगःया लिसें केन्द्रीय तहया नेतातय्सं पार्टी त्वःतेत्यंगु खँ सीदुगु दु । सरकारं विप्लव पुचःयात प्रतिबन्ध तयेवं देय्न्यंकंया प्रहरीयात विशेष निर्देशन बियाः विप्लवया कार्यकर्ता ज्वनेगु क्रम अप्वया वनेवं थुकथं पार्टी परित्याग याइपिं नं अप्वये फुगु खँ सूत्रं धाःगु दु ।
सूत्रया कथं विप्लव पुचलं नकतिनि जक थः विश्वासपात्र खड्गबहादुर विश्वकर्मा ‘प्रकाण्ड’ यात कारबाही याःगु खःसा आः प्रकाण्डं पार्टी परित्याग यायेगु तयारी यानाच्वंगु खँ सूत्रं धाःगु दु । वय्कःया लिसें स्वनिगःया मेपिं नेता कार्यकर्तां नं पार्टी परित्याग यायेगु तयारी यानाच्वंगु दु ।

पार्टी परित्याग लिपा प्रकाण्ड सहितया कार्यकर्ता मेगु पार्टी दुहां वनेगु तयारी यानाच्वंगु खँ नं धाःगु दु । विशेष यानाः उपिं मोहन वैद्य ‘किरण’ वा नयाँ शक्ति पार्टीइ दुहां वनेफइगु सम्भावना दुगु खँ सूत्रं धाःगु दु । येँय् सतक विस्तार यायेगु ज्याय् पुलांम्ह प्रधानमन्त्री डा. बाबुराम भट्टराईनं विशेष भूमिका म्हितूगु धासें पार्टी परित्याग याइपिंसं येँया कार्यकर्तातय्सं धाःसा वैद्य पुचलय् वनेमाः धायेगु यानाच्वंगु सीदुगु दु ।

थ्वहे झ्वलय् देय्या थीथी थासय् च्वंपिं कार्यकर्तां पार्टी परित्याग यानाहःगु दु । गोरखाया स्वम्ह जिल्ला स्तरीय कार्यकर्ता पार्टीं परित्याग यानागु घोषणा याःगु दु । बुधवाः मंकाः विज्ञप्ति जारी यासें जिल्ला दुजः अनिल कुमाल, युवा कमिटीया दुजः गोकुल कुमार व इलाका कमिटीया दुजः मेघराज कुमारं पार्टी परित्याग यानागु घोषणा याःगु खः । उमिसं पार्टीया लिपांगु गतिविधि प्रति थःपिनिगु असन्तुष्टि दुगु धासें पार्टी परित्याग याःगु खः ।

थ्वहे झ्वलय् सर्वोच्च अदालतं प्रहरीं नियन्त्रणय् कयातःम्ह विप्लवया नेता हेमन्तप्रकाश वली ‘सुदर्शन’ यात अदालतय् हाजिर याकेत सरकारयात निर्देशन बिउगु दु । वलीयात प्रहरीं ज्वनेवं वलीया म्ह्याय् विपना वलीं बन्दी प्रत्यक्षीकरणया रिट दायर याःगु खः । उगु रिटया सुनवाइ यासें प्रधानन्यायाधीश चोलेन्द्र शम्सेर जबराया एकल इजलासं बन्दी दयेकेमाःगु कारण सहित स्वन्हुया दुने वलीयात अदालतय् उपस्थित याके हजि धकाः आदेश बिउगु खः ।