पचली जात्राय् विधि जक पूवंकीगु

येँ (नेपालभाषा टाइम्स) – थुगुसी पचली भैरव द्यःया जात्रा न्हापा न्हापा थें तःजिक मजुइगु जूगु दु । थुगुसीया जात्रा विधि पूवंकेत जक याइगु खँ जात्रा व्यवस्थापन समितिया दुजः लिसे १२ वडाया सदश्य पुष्प प्रजापति (नातिं) ‘नेपालभाषा टाइम्स’ यात कनादीगु दु ।

वय्कःया कथं वइगु कार्तिक १ गते द्यःयात पुँया थाय् यंकेगु ज्या जुइ । वयां लिपा कार्तिक ४ गते थकु जुजुया थाय् पुजा कयाः द्यःयात गमय्बि ज्याकेगु ज्या जुइसा ५ गते द्यःयात गमं थनाः परम्परागत लँपु जुयाः हनुमानध्वाखाय् यंकाः पुजा फयेकेगु ज्या जुइ । हनुमानध्वाखा पुजा कयाः वयेधुनेवं भैरव द्यःयात पाःलाःया छेँय् यंकाः जात्रा क्वचायेकी ।

जात्राया विधि पूवंकूसां जात्राया इलय् बाजं खलः व मिसा खलःपिं दुमथ्याइगु खँ वय्कलं कनादीगु दु । द्यः जात्रा यायेगु झ्वलय् नं पीसीआर परीक्षण यानाः नेगेटिभ दुपिं झिंन्याम्हेसित जक द्यः क्वबिके बीगु जानकारी नं वय्कलं बियादीगु दु । जात्रा व्यवस्थापन समितिया अध्यक्ष बालकृष्ण डंगोल जात्रा मयासें मगाःगु जुयाः जात्रा न्ह्याकेत्यनागु खँ कनादिसें धयादीगु दु, ‘आः द्यःयात यंगालय् तयातःगु दु, थुगुसी द्यःयात दलाछि पाःलाःया छेँय् तये हयेमाः, अथे जुयाः तप्यंक द्यः पालाःया छेँय् यंकेगु खँ जुइमखु, उकिं माःगु विधि पूवंकेगु ज्या जुइ ।’

वय्कःया कथं थुगुसी जात्राया झ्वलय् रुद्र विनायक नाय्खिं बाजं छज्वः व गथु बाजं जक दइ । मेमेगु बाजंयात थुगुसी मवयेत इनाप यायेधुनागु खँ नं वय्कलं कनादीगु दु । कोरोना भाइरस संक्रमणया कारणं हुलमूल जुइके मबित थःपिसं सार्वसाधारण जनतायात आह्वान यायेगु धुनागु जाकारी नं वय्कलं बियादीगु दु । पचली भैरव द्यःया लिसें रुद्रविनायक गणेद्यः व आजु अजिमाया जात्रा जुइगु जानकारी नं वय्कलं बियादीगु दु ।

सिकालीइ नं जात्रा शुरु
थ्वहे झ्वलय् यलया सिकाली अजिमाया जात्रा नं शुरु जूगु दु । म्हिगः देय् थाकुलिया छेँय् नं विशेष पुजा लिपा अजिमायात सिकाली ख्यलय् यंकूगु खः । थुकथं प्यन्हु तक देय् थाकुलिया छेँय् नं सिकाली ख्यलय् द्यः हयेमाःगु चलन दु । प्यन्हु लिपा पुजारी मचा गुथिपाखें ज्या यायेमाःगु परम्परा दु । थ्व स्वयां न्ह्यः म्हिगः पुजारी मचा गुथिपाखें देय् थाकुलियात पुजाज्वलं दुगु ख्वल्चा हस्तान्तरण याःगु खः ।

सम्बन्धित बुखँ

LEAVE YOUR COMMENTS