आर्कब्रिजया ज्या अन्तिम चरणय्

येँ – चितवन व तनहुँ स्वाइगु मुग्लिनगय् दयेकाच्वंगु आर्कब्रिज दयेकेगु ज्या लिपांगु चरणय् थ्यंगु दु । आःनिखेरं च्वंगु पःखाःया सतह चानाः टेवा बीत पःखाः दयेकेगु व सतक पीच यायेगु ज्या ल्यं दनि । थुगु ज्या यायेगु निंतिं बिहीवाःनिसें झिंप्यन्हु तक मुग्लिन सतक खण्ड बन्द याइगु जूगु दु ।

वइगु जेठ १६ गते निसें ३० गते तक ११ बजे न्हिनय् निसें ३ बजे तक व बहनि ८ बजे निसें चान्हय् ३ बजे तक सतक बन्द यानाः ज्या याइगु खँ धाःगु दु । मुग्लिन व तनहुँ स्वाइगु तां दयेकेगु ज्या क्वचायेवं निखेरं सवारी आवागमन अःपुइगु खँ धाःगु दु । पृथ्वी राजमार्ग अन्तर्गत त्रिशुली खुसी दुगु मुग्लिनया पुलांगु तां जीर्ण व कमजोर जूगुलिं विसं २०७१ निसें आर्कब्रिज दयेकेगु ज्या न्ह्याःगु खः ।

२०७५ या मसान्तय् ज्या क्वचायेकेमाःगु खःसां नं ठेकेदार कम्पनीं थीथी कारण क्यनाः थप ई फ्वंगु खःसा थप याःगु ई नं थ्वहे जेठ मसान्तय् क्वचाइगु खँ धाःगु दु । नेपाःया नमूना तां धाःगु थुगु आर्कब्रिज दयेकेत विश्व बैंकं १२ करोड तका ग्वाहालि याःगु खः ।