ट्रम्पया पोस्ट ट्विटरं चिइकल

एजेन्सी – अमेरिकी राष्ट्रपति डोनाल्ड ट्रम्पया छगू ट्विट पोस्टयात ट्विटरं लिकयाबिउगु दु। राष्ट्रपति ट्रम्पं थःगु ट्विटय् थः कोरोनो भाइरसपाखें मुक्त जुइधुंकल धकाः च्वःगु खः ।

थ्व पोस्टयात ट्विटरं कोभिड १९ सम्बन्धया नीति कथं भ्रामक व सम्भवत खतरनाक जानकारी बियातःगु धासें चिइका बिउगु खः । ट्विटरं थ्व पोस्ट ट्विटरया कोभिड १९ सम्बन्धी नियमया उल्लंघन जूगु खँ धाःगु दु। ट्विटरं जनहीतया निंतिं थ्व ट्विट सुनां मस्वःगु हे बांलाः धकाः धाःगु दु । थ्वयां न्ह्यः फक्स न्यूजयात बिउगु छगू अन्तर्वार्ताय् नं ट्रम्पं थःत आः संक्रमण मदयेधुंकूगु थें ताः धकाः धयादीगु खः । वय्कलं थः तन्दुरुस्त दुगु व ज्याय् लिहां वयेत्यनागु खँ धाःगु दु ।

ट्रम्पं धाःगु खः, ‘जितः ताः कि जि कोरोना संक्रमणपाखें मुक्त जुइधुंकूगु दु। आः जि बेसमेन्टं पिहां वये जिइधुंकूगु दु, गुगु जिं यायेत्यनागु दु। छाय् धाःसां देय् चले यायेमाः । देय् चले यायेगु खःसा बेसमेन्ट पिहां हे वयेमाः ।’

वय्कलं धयादीगु दु, ‘ह्वाइट हाउसया डाक्टरतय्सं आः जिपाखें भाइरस मेपिंत सरे जुइमखु धाःगु दु।’ थ्वयां न्ह्यः राष्ट्रपतिया निजी चिकित्सकं राष्ट्रपतिपाखें आः सुयातं संक्रमण जुइगु खतरा मदयेधुंकल धाःगु दु ।

सम्बन्धित बुखँ

LEAVE YOUR COMMENTS