स्वनिगलय् अभाव, ख्वपय् खाली

ख्वप (नेपालभाषा टाइम्स) – स्वनिगःलिसें देय्न्यंकं कोरोना भाइरस संक्रमितया उपचारया निंति. आइसीयु, भेन्टिलेटर अभावया समाचार वयाच्वंगु इलय् ख्वपय् धाःसा पर्याप्त मात्राय् खाली जुयाच्वंगु खँ सीदुगु दु। लिपांगु इलय् निगलय् कोरोना संक्रमितया ल्याः न्हियान्हिथं अप्वया वनाः अस्पतालया बेड, आईसीयु, भेन्टिलेटरया तसकं अभाव धइगु समाचार वयाच्वंगु इलय् ख्वपय् धाःसा पर्याप्त मात्राय् दुगु खँ पिहां वःगु खः ।

ख्वप जिल्लया थीथी अस्पतालय् कोरोना संक्रमितया निंतिं व्यवस्था यानातःगु २० बेडमध्ये १५ बेड व १२ गः भेन्टिलेटर दक्वं खाली जुयाच्वंगु दु। ख्वप जिल्लाया ख्वप अस्पतालय् न्यागू, केएमसी अस्पतालय् न्हय्गू, मध्यपुर थिमिया नेपाल कोरियामैत्री अस्पतालय् च्यागू बेड कोरोना संक्रमितया उपचारया निंतिं आइसीयु बेडया व्यवस्था यानातःगु दु। ख्वप अस्पतालय् जक दक्वं बेडय् विरामी दुसा थन प्यम्ह मिजं व छम्ह मिसाया आईसीयुलय् उपचार जुयाच्वंगु दु ।

अथे हे ख्वपया थीथी अस्पतालय् व्यवस्था यानातःगु आइसोलेसन वार्ड नं खाली हे दु। जिल्ला कोभिड अस्पतालय् मुक्कं १५ गू मध्ये वार्ड खाली जुयाच्वंगु दुसा मध्यपुर अस्पतालय् नं १० गू आइसोलेसन वार्डमध्ये निम्ह जक ल्वगि वासः याकाच्वंगु दु। थनया संस्थागत आइसोलेसन वार्डतकं खाली जुयाच्वंगु जिल्ला स्वास्थ्य ज्याकूया प्रमुख कृष्णबहादुर मिजारं कनादिल । वय्कःयाकथं जनस्वास्थ्य केन्द्र, सिद्धि स्मृति अस्पताल, नेपाल कोरियामैत्री, इवामुरा, नागरिक अस्पताल, बीपी आँखा अस्पताल, समिट अस्पताल, क्यान्सर अस्पताल, आरोग्य अस्पताल यानाः पीगू आइसोलेसन वार्ड खाली जुयाच्वंगु दु ।

ख्वप जिल्लाय् जक संस्थागत आइसोलेसन ७०३ गू दुसा उकीमध्ये ३४४ जक उपयोग जुयाच्वंगु दु। अथे हे खारिपाटीस्थित विद्युत प्राधिकरणय् नं १२२ वार्ड खाली दु।